Ulttyq bank teńge baǵamyn turaqtandyrý sharalaryn júrgizip jatyr
2022 jylǵy 5 mamyr 12:18

Ulttyq bank teńge baǵamyn turaqtandyrý sharalaryn júrgizip jatyr

NUR-SULTAN. QazAqparat – QR Ulttyq Banki teńge baǵamynyń kúrt ózgerýi men onyń ınflıatsııaǵa áserin shekteý sharalaryn júrgizýde. Bul týraly bank tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Ulttyq bank teńge baǵamynyń kúrt ózgerýin jáne onyń ınflıatsııaǵa áserin shekteý sharalaryn qabyldaýda. Keı kúnderi valıýtalyq ınterventsııalar da júrgizdi. Bul týraly aqparat jedel túrde jarııalandy», - dedi Ǵ. Pirmatov Senattyń búgingi otyrysynda.

Ulttyq bank tóraǵasynyń aıtýynsha, kvazımemlekettik sektor sýbektileriniń valıýtany satý kólemin ulǵaıtý maqsatynda olardyń jalpy valıýtalyq túsiminiń mindetti satý mólsheri 50%-dan 75%-ǵa deıin ulǵaıtyldy.

«Ulttyq valıýtanyń ornyqtylyǵyn qamtamasyz etý, kapıtaldy shyǵarýǵa jol bermeý jáne alypsatarlyq suranysty tómendetý úshin birinshi kezektegi daǵdarysqa qarsy sharalar aıasynda transshekaralyq qarjy operatsııalaryn baqylaý sharalary kúsheıtildi, valıýta men altyndy áketýge shekteý qoıyldy.

Qolma-qol shetel valıýtasynyń ishki naryqtaǵy jaǵdaıdy qalypqa keltirý sharalary qabyldandy. Halyqtyń suranysyn qanaǵattandyrý úshin qolma-qol shetel valıýtasy jetkilikti mólsherde ákelindi», - dedi spıker.

Qabyldanǵan sharalarǵa baılanysty ishki valıýta naryǵyndaǵy jaǵdaı turaqtalyp keledi.

«Geosaıası jaǵdaıdyń nasharlaýyna baılanysty jahandyq qarjy, taýar naryqtarynda buryn-sońdy bolmaǵan ózgerister aıasynda teńgeniń baǵamy bıylǵy 15 naýryzda eń joǵary – 512,17 teńgege deıin álsirep, sáýirdiń qorytyndysy boıynsha 445,62 teńgege deıin nyǵaıdy. Qazirgi ýaqytta suranys pen usynys teńesip tur», - dedi Ulttyq bank tóraǵasy.

Buǵan deıin Ǵalymjan Pirmatov Qazaqstan úshin syrtqy ınflıatsııalyq jaǵdaı nelikten qolaısyz bolatynyn túsindirgen edi.

Sondaı-aq, birinshi toqsanda jalpy ishki ónim 4,4%-ǵa ósip, ekonomıka ósimi pandemııaǵa deıingi deńgeıine oralǵan.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT