UQShU qorǵanys mınıstrleri qaýip-qaterlerge jaýap berý tetikterin talqylady
2022 jylǵy 24 mamyr 20:38

UQShU qorǵanys mınıstrleri qaýip-qaterlerge jaýap berý tetikterin talqylady

NUR-SULTAN. QazAqparat – Ujymdyq qaýipsizdik týraly shart uıymyna múshe elderdiń qorǵanys vedomstvolarynyń basshylary áskerı qaýipsizdikke tónetin qaýip-qaterler men olarǵa jaýap berý máselelerin talqylady. QazAqparat bul týraly QR Qorǵanys mınıstrliginiń baspasóz qyzmetine silteme jasap habarlaıdy.

Usynylǵan aqparatqa sáıkes, beınekonferentsııa rejıminde ótken otyrysta ujymdyq qaýipsizdik aımaqtaryndaǵy áskerı qaýipsizdikke tónetin qaýip-qaterler, olarǵa qarsy is-qımyl sharalary jóninde pikir almasý boldy. Budan bólek, daǵdarysqa qarsy den qoıý júıesin jetildirý jáne uıym sheńberinde bitimgerlik áleýetti damytý máseleleri talqylandy.

«16 mamyrdaǵy sammıtte Qazaqstan Prezıdenti atap ótkendeı, UQShU-ny Birikken Ulttar Uıymynyń bitimgerlik qyzmetine qosý boıynsha jumysty jandandyrý qajet dep sanaımyz. Bul UQShU-nyń quqyqtyq sýbektiligin nyǵaıtyp qana qoımaı, beıbitshilikti qoldaý jónindegi halyqaralyq operatsııalarǵa is júzinde qatysý arqyly uıymnyń bitimgerlik áleýetin damytýǵa qyzmet etedi», – dedi Qazaqstan Qorǵanys mınıstri Rýslan Jaqsylyqov.

Kezdesý qorytyndysy boıynsha UQShU Ujymdyq qaýipsizdik júıesiniń basqarý organdaryn birlesip daıarlaý jáne kúshteri men quraldaryn jasaqtaýdyń 2023 jylǵa arnalǵan jospary qabyldandy. Radıoelektrondyq kúres mamandyqtary boıynsha áskerı kadrlar daıarlaý jónindegi bazalyq oqý-ádistemelik jáne UQShU-ǵa múshe memleketterdiń radıoelektrondyq kúresti damytý problemalaryn zertteý salasyndaǵy bazalyq ǵylymı-zertteý uıymy týraly erejeler bekitildi.

UQShU Qorǵanys mınıstrleri keńesiniń kezekti otyrysyn 2022 jyldyń ekinshi jarty jyldyǵynda Armenııa Respýblıkasynda ótkizý josparlanyp otyr.


Jańalyqtar

MURAǴAT