UQShU áskeri Qazaqstan aýmaǵynan tolyq ketti
2022 jylǵy 19 qańtar 14:53

UQShU áskeri Qazaqstan aýmaǵynan tolyq ketti

NUR-SULTAN. QazAqparat – UQShU bitimgershilik áskeri Qazaqstan aýmaǵynan tolyq ketti. Bul týraly Qorǵanys mınıstrligi halyqaralyq yntymaqtastyq departamentiniń bastyǵy Oljas Qusaıynov málim etti, dep habarlaıdy QazAqparat tilshisi.

«Búgin Ujymdyq qaýipsizdik týraly shart uıymy ujymdyq bitimger kúshterin Qazaqstan aýmaǵynan shyǵarý aıaqtaldy. Sońǵy jeke quram men tehnıka áýe kemesimen Almatydan ushyp shyqty. Qazirgi Qazaqstan Respýblıkasynyń aýmaǵynda shet memleketterdiń áskerı qyzmetshileri joq. Elimizden UQShU-nyń birikken bitimgershilik kontıngentin kezeń-kezeńimen shyǵarý bıyl 13 qańtardan bastap Qarýly kúshterdiń Joǵary bas qolbasshysy – Qazaqstan Respýblıkasynyń Prezıdenti Qasym-Jomart Kemeluly Toqaev belgilegen merzimde júzege asyryldy», -dedi mınıstrlik ókili ortalyq kommýnıkatsııalar qyzmetinde ótken brıfıngide.

Onyń aıtýynsha, birlesken bitimger kontıngenti Qazaqstan aýmaǵynda ujymdyq qaýipsizdik týraly sharttyń 2 jáne 4-baptaryna sáıkes áreket etken.

«Jyl saıyn ótetin birlesken oqý-jattyǵý, onyń ishinde myzǵymas baýyrlastyq bitimgershilik oqý-jattyǵý barysynda ázirlengen is-qımyldar úılesimdiliginiń arqasynda uıymnyń bitimgershilik áleýeti jedel iske qosyldy», -dedi Oljas Qusaıynov.


Jańalyqtar

MURAǴAT