UQK: Qylmyskerler «Kóktóbe» tele-radıohabar taratý munarasyn basyp alýǵa tyrysty
2022 jylǵy 11 qańtar 21:50

UQK: Qylmyskerler «Kóktóbe» tele-radıohabar taratý munarasyn basyp alýǵa tyrysty

ALMATY. QazAqparat – Shekarashylar Almaty qalasynyń strategııalyq mańyzy bar nysandaryn basyp alýǵa jol bermedi, dep habarlaıdy QazAqparat UQK baspasóz qyzmetine silteme jasap.

Komıtettiń málimetinshe, Shekara qyzmeti Almaty oblysy boıynsha departamentiniń jeke quramy quqyq qorǵaý organdarymen jáne áskerı qurylymdarmen birlese otyryp, Almaty qalasynyń ákimshiligi men strategııalyq mańyzy bar nysandaryn qorǵaýǵa tikeleı qatysqan.

«Mıtıng kezinde qylmyskerler «Kóktóbe» teledıdar men radıohabar munarasyn basyp alýǵa tyrysty, osylaısha bandıtter aqparattyq basymdyqqa ıe bolyp, óz talaptaryn qoıýdy kózdegen edi, alaıda shekarashylar shabýylǵa toıtarys berdi», delingen habarlamada.

Sonymen qatar, shekarashylar «Medeý» selden qorǵaý bógetiniń perımetrin de baqylaýǵa aldy.

«Kontrterrorıstik operatsııanyń belsendi kezeńinde departamenttiń áskerı qyzmetshileri UQK Shekara qyzmetiniń arnaıy bólimshesimen birge qylmyskerlerdi, sondaı-aq zańsyz jolmen shetel asyp jasyrynýǵa tyrysqan adamdardy anyqtaý jáne ustaý jumystaryn júzege asyrdy», delingen habarlamada.

Qazir shekara áskerleriniń bólimsheleri nysandarda jaýyngerlik kezekshilikti atqarýda.


Jańalyqtar

MURAǴAT