Úkimettiń jumys toby Jambyl jáne Almaty oblystarynyń turǵyndarymen kezdesedi

NUR-SULTAN. QazAqparat - 14-16 qarasha aralyǵynda QR Premer-Mınıstriniń orynbasary Berdibek Saparbaev bastaǵan Úkimettiń jumys toby issaparmen Jambyl jáne Almaty oblystaryna, sondaı-aq Almaty qalasyna barady, dep habarlaıdy QazAqparat Premer-mınıstr orynbasarynyń baspasóz qyzmetine silteme jasap.

Jumys tobynyń quramyna úkimettiń áleýmettik blogynyń: bilim jáne ǵylym, densaýlyq saqtaý, eńbek jáne halyqty áleýmettik qorǵaý, mádenıet jáne sport, aqparat jáne qoǵamdyq damý mınıstrlikteriniń basshylary kiredi.

Óńirlerde jumys tobynyń músheleri jurtshylyqpen, eńbek ujymdarymen, densaýlyq saqtaý jáne bilim berý salasynyń qyzmetkerlerimen, jastarmen kezdesedi. Azamattardy jeke máseleleri boıynsha qabyldaıdy, birqatar áleýmettik jáne mádenı nysandardy, sondaı-aq aýdandardy aralap, kóptegen mádenı is-sharalarǵa qatysady.

Atap aıtqanda, 14 qarashada Taraz qalasynda Altyn Ordanyń 750 jyldyǵyna arnalǵan «Talas qurylysy: tarıh pen taǵylym» atty halyqaralyq ǵylymı-praktıkalyq konferentsııa ótedi.

15 qarashada Almatyda Respýblıkalyq jastar forýmy, Múgedekterdiń quqyqtaryn qorǵaý jónindegi úılestirý keńesi jáne tehnıkalyq ońaltý quraldarynyń kórmesi ótedi.

Al Almaty oblysyna Úkimettiń jumys toby 15-16 qarasha kúnderi keledi.

Jumys saparynyń negizgi maqsaty – Elbasynyń «Syndarly qoǵamdyq dıalog-Qazaqstannyń turaqtylyǵy men órkendeýiniń negizi» atty Qazaqstan halqyna joldaýynda belgilengen mindetterdi el Úkimetiniń iske asyrýy týraly halyqty aqparattandyrý.

Osyǵan deıin Úkimettiń jumys tobynyń ókilderi Atyraý, Aqtóbe, Shyǵys Qazaqstan, Túrkistan oblystary men Almaty jáne Shymkent qalalarynyń turǵyndarymen kezdesken bolatyn.