Úkimettik komıssııa Almaty qalasy men Almaty oblysyn qalpyna keltirý jumystarymen tanysty
2022 jylǵy 20 qańtar 19:09

Úkimettik komıssııa Almaty qalasy men Almaty oblysyn qalpyna keltirý jumystarymen tanysty

NUR-SULTAN. QazAqparat - QR Premer-Mınıstriniń birinshi orynbasary Roman Sklıar tártipsizdikter saldarynan keltirilgen zalaldy óteý jáne qalpyna keltirý máseleleriniń barysymen tanysý maqsatynda Almaty qalasy men Almaty oblysyna jumys saparymen bardy. QazAqparat bul týraly primeminister.kz saıtyna silteme jasap habarlaıdy.

Almaty qalasynyń ákimi Baqytjan Saǵyntaev búgingi tańda qalada kólik qatynasy men azyq-túlik kásiporyndary shtattyq rejımde jumys istep turǵanyn, jol ınfraqurylymyn qalpyna keltirý boıynsha qarqyndy jumystar júrgizilip jatqanyn habarlady.

27 qalalyq ǵımaratty jóndeý-qalpyna keltirý jumystaryn júrgizý qajet, onyń ishinde 10 memlekettik jáne jeke menshik múlik nysandary bıýdjet qarajaty esebinen qaıta jańartylatyn bolady. Qalǵan 17 nysanǵa keltirilgen zalal úlken emes, olar bıznestiń áleýmettik jaýapkershiligi aıasynda qalpyna keltiriledi. Qalada 20 qurylys kompanııasynyń kúshimen 9 nysandy tazalaý jumystary júrgizildi, 800-ge jýyq adam jáne 40 birlikten astam arnaıy tehnıka tartyldy. Sondaı-aq, beınebaqylaý kameralaryn qalpyna keltirý jumystary júrgizilýde. Qazirgi ýaqytta búlingen 587 beınebaqylaý kamerasynyń 434-i qalpyna keltirildi. Barlyq beınebaqylaý kameralaryn qalpyna keltirý jumystary 21 qańtarda aıaqtalady.


Sonymen qatar Open Almaty Qoǵamdyq qabyldaýy bazasynda tártipsizdikterden zardap shekken ShOB ókilderine keltirilgen zalaldy óteý máseleleri boıynsha jedel jeli quryldy. Taldyqorǵan qalasynda Komıssııa Almaty oblysynyń ákimi Q. Bozymbaevpen birge 2 mádenıet nysanyn jóndeý jumystarynyń aıaqtalýyn tekserdi. Memlekettik organdardyń 5 ǵımaratyn qalpyna keltirý bastaldy. Jumysqa 400-den astam adam jáne 14 birlik tehnıka tartyldy. «Atameken» UKP málimeti boıynsha óńirde 141 kommertsııalyq nysan zardap shekken. 120-dan astam ShOB uıymdary qalpyna keltirý jumystaryn aıaqtap, ózderiniń negizgi qyzmetine kiristi. Almaty oblysy boıynsha keltirilgen zalaldyń jalpy somasy 16,1 mlrd teńgeni qurady. R. Sklıar óńirlerdi qalpyna keltirý jáne olardyń tynys-tirshiligin jaqsartý boıynsha qarqyndy jumysty jalǵastyrýdy tapsyrdy.


Jańalyqtar

MURAǴAT