Úkimet rezervi qarajaty esebinen kásipkerlerge keltirilgen zalaldy óteý mehanızmi bekitildi
2022 jylǵy 18 qańtar 21:08

Úkimet rezervi qarajaty esebinen kásipkerlerge keltirilgen zalaldy óteý mehanızmi bekitildi

NUR-SULTAN. QazAqparat - QR Premer-Mınıstriniń birinshi orynbasary Roman Sklıar Jekelegen óńirlerdegi tártipsizdikter nátıjesinde keltirilgen zalaldardy joıý máseleleri jónindegi Úkimettik komıssııanyń kezekti otyrysyn ótkizdi. Bul týraly primeminister.kz saıty habarlaıdy.

Óńirlerdiń ákimdikterimen jáne múddeli memlekettik organdarmen oryn alǵan tártipsizdikter nátıjesinde keltirilgen zalaldy óteý jáne qalpyna keltirý jumystaryn uıymdastyrý máseleleri qaraldy.

Júrgizilip jatqan jumystar týraly ındýstrııa jáne ınfraqurylymdyq damý mınıstri Q. Óskenbaev jáne Almaty, Shymkent qalalary, Almaty, Jambyl, Shyǵys Qazaqstan, Qyzylorda oblystary ákimderiniń orynbasarlary egjeı-tegjeıli baıandama jasady. 8 óńirde 270 nysan, onyń ishinde 45 ákimshilik jáne 225 kommertsııalyq ǵımarat zardap shekti. 44 ákimshilik nysandy qalpyna keltirý boıynsha jumystar bastaldy, al Shymkent jáne Almaty qalalarynda 12 kommertsııalyq nysan boıynsha jumystar aıaqtaldy.

Budan basqa, komıssııa otyrysynda Úkimet rezervi qarajaty esebinen shaǵyn jáne orta bıznes ókilderine keltirilgen zalaldy óteý mehanızmi bekitildi. Bekitilgen mehanızmge sáıkes kásipkerlerdiń jyljymaıtyn múlik obektileri boıynsha zalal rastalǵan smetalyq qujattama negizinde óteletin bolady. Bul rette joǵalǵan taýarlyq-materıaldyq qundylyqtar boıynsha óteý kólemin óńirlik komıssııalar «Atameken» ulttyq kásipkerler palatasymen birlesip, rastaıtyn fıskaldyq qujattardy negizge ala otyryp aıqyndaıtyn bolady.

R. Sklıar zardap shekken nysandardy qalpyna keltirý jáne tekserýdi aıaqtaý boıynsha jumystardy jedeldetý, sondaı-aq qabyldanyp jatqan sharalar týraly halyqty habardar etý týraly tapsyrma berdi.


Jańalyqtar

MURAǴAT