Jańalyqtar  >
Úkimet basshysy Nur-Sultandaǵy óndiristik jáne áleýmettik nysandardyń qurylysyn tekserdi
2022 jylǵy 13 tamyz 14:30

Úkimet basshysy Nur-Sultandaǵy óndiristik jáne áleýmettik nysandardyń qurylysyn tekserdi

NUR-SULTAN. QazAqparat - QR Premer-Mınıstri Álıhan Smaıylov Nur-Sultan qalasyndaǵy jańa óndiristik jáne áleýmettik nysandar qurylysynyń barysymen tanysty, dep habarlaıdy QazAqparat Úkimettiń resmı saıtyna silteme jasap.

Úkimet basshysy «Astana Tehnopolıs» AEA aýmaǵyndaǵy «YDA Industrial Park» kópbeıindi zaýytynyń qurylys alańyna bardy. Kásiporyn medıtsınalyq jabdyqtar, medıtsınalyq jáne keńse jıhazdaryn, modýldik qurama qurylystar, sondaı-aq qasbetter, vıtrajdar, terezeler men esikter óndirý boıynsha ıntegratsııalanǵan keshen bolyp tabylady. Zaýyt ónimderi tek ishki naryqqa ǵana emes, kórshi elderge de eksporttalatyn bolady. Jalpy quny 46 mln dollardan asatyn joba sheteldik ınvestorlar esebinen júzege asyrylyp jatyr.

Premer-Mınıstr zaýytty iske qosý qazirgi kezde shetelden ákelinetin ónim ımportyn almastyrýǵa oń áserin tıgizetinin atap ótti.

«Elimizde kásipkerlik erkindigin qamtamasyz etýge jáne ınvestıtsııalyq ahýaldy jaqsartýǵa baǵyttalǵan ekonomıkalyq reformalar júzege asyrylyp jatyr. Biz ınvestorlardyń kelýin árdaıym qoldaımyz. Bul joba – Qazaqstanda tıimdi jumys istep, kórshi aımaqtardyń naryqtaryna shyǵýǵa bolatyndyǵynyń dáleli», — dedi Úkimet basshysy.

Óz kezeginde «YDA Group» basqarma tóraǵasy Hýseın Arslan bes kásiporynnyń tórteýi Qazaqstanda alǵash ret ashylatynyn atap ótti.

«Qazaqstandyq tarapqa belsendi qoldaý kórsetkeni úshin alǵysymdy bildiremin. Biz tıisti mınıstrlikpen tyǵyz yntymaqtastyqta jumys isteımiz, sondyqtan ózimizge senimdimiz», — dedi Hýseın Arslan.

Sonymen qatar Úkimet basshysy eki aýysymda 2400 oqýshyny qabyldaý áleýeti bar 1200 oryndyq jańa jalpy bilim beretin mektep qurylysynyń barysymen tanysty. Oqý orny halyq tyǵyz ornalasqan Esil aýdanynda salynyp jatyr, bul №84 jáne №85 mektep-lıtseılerinde oryn tapshylyǵy máselesin sheshýge múmkindik beredi. Mektepti jyl sońynda paıdalanýǵa berý josparlanyp otyr.

Jalpy, bıyl elordada 11 mekteptiń qurylysyn aıaqtaý kózdelgen. Bul qosymsha 23 myńnan astam oqýshy ornyn ashýǵa múmkindik beredi.

«Sońǵy jyldary jyl saıyn 400 myńǵa jýyq bala dúnıege keledi. Olardyń bári qazirgi tańda mektepke baryp jatyr, al mektepterdiń shamadan tys júktelýi baıqalady. Sondyqtan mektep qurylysyn respýblıkalyq bıýdjetten qarjylandyrýdy ulǵaıtý josparlanyp otyr. Elordanyń jańa mektepterinde jaraqtandyrýdyń joǵary standarttary qalyptasqan. Balalarǵa qolaıly jaǵdaıda oqýǵa múmkindik berý úshin elimizde salynyp jatqan basqa da bilim mekemelerinde osy standarttardyń bolǵanyn qalaımyz», — dedi Premer-Mınıstr.

Sondaı-aq Álıhan Smaıylov Á. Bekturov kóshesi boıyndaǵy 577 páterlik turǵyn úıdiń qurylysyna bardy. Onyń 189 páteri apatty úılerdiń turǵyndaryna beriledi.

«Sońǵy úsh jylda elordada turǵyn úı qurylysy boıynsha bes jyldyq kórsetkish ájeptáýir artty – 2019 jyldan bastap 8 mln sharshy metr turǵyn úı paıdalanýǵa berildi. Jalpy, Memleket basshysynyń tapsyrmasy boıynsha elordada Qoljetimdi turǵyn úı qurylysynyń kólemi bes eseden astam ulǵaıdy», — dedi Úkimet basshysy.

Sondaı-aq Álıhan Smaıylov Úkimet atynan qurylys salasynyń qyzmetkerlerin kásibı merekelerimen quttyqtady.

«Qurylys - otandyq ekonomıkanyń mańyzdy jáne serpindi damyp kele jatqan salasy. Bıyl birinshi jartyjyldyqta qurylys kólemi 9%-dan astam ulǵaıdy, 6,6 mln sharshy metrden astam turǵyn úı paıdalanýǵa berildi. Osy múmkindikti paıdalana otyryp, elimizdiń qurylysshylary men sala ardagerlerine tolaıym tabys, zor densaýlyq jáne amandyq tileımin!», — dedi Álıhan Smaıylov.

Sondaı-aq jumys saparyna ındýstrııa jáne ınfraqurylymdyq damý mınıstri Qaıyrbek Óskenbaev pen elorda ákimi Altaı Kólginov qatysty.



Foto: primeminister.kz





Uqsas jańalyqtar
Seriktester jańalyqtary

Jańalyqtar

Úrdis

MURAǴAT