Jańalyqtar  >
Úkimet basshysy arendalyq turǵyn úıdi satyp alýdaǵy qaıshylyqty sheshýdi tapsyrdy
2022 jylǵy 5 shilde 10:21

Úkimet basshysy arendalyq turǵyn úıdi satyp alýdaǵy qaıshylyqty sheshýdi tapsyrdy

NUR-SULTAN. QazAqparat – QR Premer-Mınıstri Álıhan Smaıylov Úkimet otyrysynda «Nurly jer» baǵdarlamasy boıynsha salynǵan arendalyq turǵyn úıdi satyp alýǵa salynǵan tyıymnyń zańnamaǵa qaıshy tustaryn retteýdi tapsyrdy, dep habarlaıdy QazAqparat tilshisi.

«Nurly jer» baǵdarlamasy men turǵyn úı qatynastary týraly zań normalary boıynsha azamattardyń suraqtary bar. Mysaly, memlekettik baǵdarlama boıynsha arendalyq turǵyn úı alǵan adamdarǵa ony satyp alýǵa ruqsat berilmeıdi. Al zań boıynsha kommýnaldyq úıdi satyp alýǵa tyıym salynbaǵan. Bul jerde norma qaıshylyǵy týyndap turǵan joq pa? Másele qalaı sheshiledi?», -dep surady Úkimet basshysy QR Indýstrııa jáne ınfraqurylymdy damý mınıstri Qaıyrbek Óskenbaevtan.

Mınıstrdiń aıtýynsha, bul máseleni Parlament depýtattary da kótergen.

«Shynynda da halyq arasynda qazir osy másele kóp talqylanyp jatyr. 2017 jylǵa deıin biz jalǵa berilgenimen, satyp alýǵa ruqsat etiletin úılerdi salǵanbyz. 2017 jyldan bastap jalǵa berilgenimen satylmaıtyn úılerdi salyp bastadyq. Qazir zań jobasy Parlamentte talqylanyp jatyr. Jumys tobynda depýtattar da osy máseleni kóterdi. Sony talqylap, bir oń sheshimge kelemiz dep oılap otyrmyz. Osy zań talqylanǵanda osy máseleni qarastyryp, naqty sheshim tabýǵa tyrysamyz», - dedi vedomsto basshysy.

Álıhan Smaıylov bul máselede zańnama qaıshylyǵy bolmaýy kerektigin eskertti.


Foto: primeminister.kz


Uqsas jańalyqtar
Seriktester jańalyqtary

Jańalyqtar

Úrdis

MURAǴAT