Tutynýshylardyń quqyǵyn qorǵaý úshin zańnamalyq túzetýlerdiń 2-shi toptamasy ázirlenýde
2021 jylǵy 24 qarasha 19:07

Tutynýshylardyń quqyǵyn qorǵaý úshin zańnamalyq túzetýlerdiń 2-shi toptamasy ázirlenýde

NUR-SULTAN. QazAqparat – Tutynýshylardyń quqyqtaryn qorǵaýdy odan ári jetildirý aıasynda zańnamalyq túzetýlerdiń 2-shi toptamasy ázirlenip jatyr. Bul týraly QR Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.

«Sáıkestikti baǵalaý jáne akkredıtteý júıesindegi oryn alyp otyrǵan qatysýshylardyń senimsizdigi jáne onyń halyqaralyq talaptarmen úılespeýi biraz problemany týyndatyp otyr. Osyǵan baılanysty mınıstrlikpen «Sáıkestikti baǵalaý týraly» jańa zań jobasy bıznes pen qoǵamda ashyq talqylanýda», - dedi mınıstr Senatta ótken Úkimet saǵatynda.

Onyń atap ótýinshe, bul jumystyń qorytyndysynda sáıkestikti baǵalaý rásimderiniń durystyǵyn jetildirýge jáne adal básekelestikke baǵyttalatyn sheshim qabyldanatyn bolady. Sondaı-aq elimizdiń aýmaǵynda qaýipsiz ónimdi óndirý jáne aınalysqa jiberý úshin barlyq jaǵdaı jasaý josparlanǵan.

«Tutynýshylardyń quqyqtaryn qorǵaýdy odan ári jetildirý aıasynda zańnamalyq túzetýlerdiń 2-shi toptamasy ázirlenýde. Ol ulttyq tutynýshylar qaýymdastyǵyn qurý, Ombýdsmen ınstıtýtyn engizý jáne elektrondyq saýdada tutynýshylardyń quqyqtaryn qorǵaýdy kúsheıtý bastamalaryn kózdeıdi», - dedi Baqyt Sultanov.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT