+7 (701) 759 90 19
USD 405.69 EUR 455.51
RUB 5.72 CNY 57.42
Jańalyqtar

Turmystyq qaldyqtardy óńdeýsiz kómýge tyıym salyndy: SQO-da ahýal qandaı

2019 jylǵy 22 qarasha 14:39
Bólisińiz:
Turmystyq qaldyqtardy óńdeýsiz kómýge tyıym salyndy: SQO-da ahýal qandaı

PETROPAVL. QazAqparat – Soltústik Qazaqstan oblysynda turmystyq qatty qaldyqtar tek eki aýdanda ǵana túrine qaraı bólek jınalady. Óńirde qoqysty paıdaǵa jaratý 10% aspaıdy, dep habarlaıdy QazAqparat tilshisi.

Elimizde polıgondarda turmystyq qatty qaldyqtardy: shyny, plastmassa men polıetılendi bıyldan bastap aldyn ala óńdeýsiz kómýge tyıym salynady. SQO aýmaǵynda qazir turmystyq qatty qaldyqtardyń ruqsat etilgen 17 polıgony jumys isteıdi. Alaıda, ol jerlerde qaıta óńdeý men suryptaý jumystary júrgiziletin oryndar joq. ıAǵnı turmystyq qaldyqtardy kádege jaratý tıisti deńgeıde jolǵa qoıylmaǵan.

Mamandardyń esebinshe, jyl saıyn óńirde 66 myń tonna qoqys jınalady. Qoqys suryptalmaǵandyqtan qaldyqtardy qaıta óńdeý úlesi byltyr 7,6% ǵana quraǵan. Bıyl bul kórsetkish 10% jetpek.

Qazir turmystyq qatty qaldyqtar túrine qaraı eki aýdanda ǵana bólek jınalady.

«Aýdandarda bul jumys nashar júrgizilip jatyr. Tek Aqjar men Qyzyljar aýdanynda ǵana turmystyq qatty qaldyqtar suryptalady. Esil aýdanynda qoqysty bólip jınaýǵa konteınerler alyndy. Qazir osy ispen aınalysatyn kásipker izdestirilip jatyr. Aıyrtaý men Aqqaıyń aýdanynda bıznes ókilderimen kelissózder júrgizilse, qalǵan aýdandarda kásipkerlerdiń onymen aınalysýǵa qulqy joq», - deıdi SQO Tabıǵı resýrstar jáne tabıǵatty paıdalanýdy retteý basqarmasynyń basshysy Marat Eskendirov.

Petropavl qalasynda qaıtalama shıkizatty qabyldaıtyn 9 pýnkt bar, onyń altaýy bıyl ashyldy. Aýlalarda qoqys jınaıtyn oryndardyń janyna qaǵaz, plastık jınaıtyn arnaıy konteınerler qoıylǵan. Budan bólek, qala kóshelerinde qoldanylǵan synapty shamdar men batareıalardy jınaıtyn qyzǵylt sary konteınerlerdi kórýge bolady. Sondaı-aq isten shyqqan turmystyq tehnıkany da qabyldaıtyn oryn jumys isteıdi. Suryptalǵan qoqys shıkizat retinde óńirdegi kásiporyndarǵa jetkiziledi. Búginde SQO-da qatty qaldyqtardy óńdeıtin úsh: «Radýga», «Petropak», «Petropavlovsk LS» jaýapkershiligi shekteýli seriktestik bar.

Qazirgi ýaqytta turmystyq qatty qaldyqtardy qaıta óńdeý jumysy jaqsy tabys kózine aınalǵan. Máselen, «Radýga» kásipornynda buryn qoldanylǵan polımerler óńdelip, halyq kúndelikti tutynatyn taýarlar shyǵarylady.

Tabıǵı resýrstar jáne tabıǵatty paıdalanýdy retteý basqarmasynyń málimetinshe, memlekettik-jekeshelik áriptestik aıasynda «Qaldyqtardy suryptaıtyn keshendi salyp, paıdalaný» jobasyn júzege asyrý josparlanǵan. Mamandardyń sózine qaraǵanda, bul jerde qoqys suryptalyp, keıin qaıtalama shıkizat retinde óńdeýge jiberiledi.

Bizdiń kanalymyzǵa jazylyńyz:

Bólisińiz:

Avtor:

Aqerke Dáýrenbekqyzy

Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Kojakeldıev E.
Kojakeldıev E.
954-059
REDAKTOR
Janat Qapalbaeva
Janat Qapalbaeva
954-059
REDAKTOR
Altynbek Kýmarzak
Altynbek Kýmarzak
954-059

MURAǴAT