Túrkistandyq tergeýshiler 25 jyl buryn iz-tússiz ketken sheteldik qyzdy jaqyndarymen qaýyshtyrdy
TÚRKІSTAN. QazAqparat - Túrkistandyq tergeýshiler 25 jyl buryn iz-tússiz ketken sheteldik qyzdy jaqyndarymen qaýyshtyrdy, dep habarlaıdy QazAqparat Polisia.kz-ke silteme jasap.
Ótken jyldyń naýryz aıynda Túrkistan oblysy Saryaǵash aýdandyq polıtsııa bólimine kórshiles qaladaǵy polıtsııa bóliminen Ózbekstan Respýblıkasynyń azamaty, ıaǵnı úı-kúısiz (aty-jóni belgisiz, qujatsyz) júrgen 40-tan asqan áıeldiń isi kelip túsken. Onda Shymkent qalasyndaǵy daǵdarys ortalyǵyna túsken ózbekstandyq áıel Saryaǵash aýdanynda prıtonda seksýaldyq quldyqta bolǵanyn, 10 jasynda áke-sheshesi Ózbekstan Respýblıkasyna belgisiz bireýlerge satyp jibergenin aıtqan.
Osy is boıynsha saryaǵashtyq polıtseıler jan-jaqty tergeý áreketterin júrgizdi. Sol jyldyń qarashasynda is Túrkistan oblysy PD-nyń óndirisine qabyldandy. Tergeý barysynda sot-medıtsınalyq, sot-psıhıatrııalyq saraptamalary taǵaıyndaldy. Onyń jaqyn tanystarynan jaýap alyndy. Osydan soń jeltoqsan aıynda QR ІІM arqyly Ózbekstan Respýblıkasyna jábirlenýshiniń jeke basyn anyqtaý men oǵan qatysty shynynda adam saýdasy qylmysy oryn alǵan nemese almaǵandyǵyn anyqtaý úshin halyqaralyq tapsyrma joldandy.
Polıtsııa departamentimen júrgizilgen júıeli jumys nátıjesinde departament qyzmetkerleri Ózbekstan Respýblıkasy Qashqadarııa oblysy ShaHrısabz aýdany Sarchashma aýylynan jábirlenýshiniń áke-sheshesi, týǵan-týystaryn anyqtap, olarmen kezdesý jumystaryn júrgizdi. Túrkistan oblysy polıtsııa departamentiniń polıtseıleri áıeldiń zańdy túrde qujattanýy úshin qajetti sharalardyń barlyǵyn atqaryp, jeke kýáligi men tólqujatyn alýǵa yqpal etti. Qazirgi tańda jábirlenýshiniń óz eline oralýyna jaǵdaı jasalyp jatyr.
Anyqtalǵandaı, jábirlenýshi 17 jasynda úıinen ketip qalǵan. Al jábirlenýshiniń quldyqta boldym, áke-sheshem satyp jibergen degen ýájderi dálelin tappaı QR QPK-niń 35-babynyń 1-bóliginiń 2-tarmaǵymen toqtamǵa alyndy.
