Túrkistandaǵy jarylystan zardap shekkenderdiń densaýlyǵy belgili boldy

TÚRKІSTAN. QazAqparat – Túrkistandaǵy jarylystan órt sóndirýshiler men turǵyndardan 10 adam zardap shekti. Bul týraly oblystyq Qoǵamdyq densaýlyq saqtaý basqarmasynyń baspasóz qyzmetinen málim etti, dep habarlaıdy QazAqparat tilshisi.

Basqarmanyń málimetinshe, zardap shekkenderdiń 7-eýi órt sóndirýshiler. Olar qalalyq ortalyq aýrýhanaǵa jatqyzyldy. Dárigerler naýqastardyń túrli deńgeıde kúıik shalǵanyn aıtady.

«Aýyr jaǵdaımen jansaqtaý bólimine jatqyzylǵandar joq», - dedi vedomstvodan.

Al zardap shegýshilerdiń ózgeleri – qala turǵyndary. Olar «qan qysymynyń kóterilýi» jáne «stress jaǵdaıy» dıagnozdarymen túsken. Alǵashqy medıtsınalyq kómek kórsetilgennen keıin barlyǵy úılerine qaıtarylǵan.

Buǵan deıin habarlaǵanymyzdaı, Túrkistan qalasynda Sattarhanov kóshesinde ornalasqan «ROYAL GRAND HOTEL» qonaqúıiniń aýmaǵynda jarylys boldy. Málim bolǵandaı, qonaqúıdiń artqy jaǵynda gaz tsısternasyn toltyrý barysynda gaz tasymaldaıtyn avtokólik jarylǵan. «Qazirgi tańdaǵy aqparat boıynsha, qaza bolǵandar joq», - dedi oblystyq Tótenshe jaǵdaılar departamentiniń bastyǵy Nurǵalı Júnisov.