Túrkistanda UBT kezinde qýlyq jasaǵan 100-den astam oqýshynyń nátıjesi qaıta tekseriledi
2022 jylǵy 29 maýsym 20:36

Túrkistanda UBT kezinde qýlyq jasaǵan 100-den astam oqýshynyń nátıjesi qaıta tekseriledi

NUR-SULTAN. QazAqparat - Ulttyq testileý ortalyǵynyń dırektory Rýslan Emelbaev UBT kezindegi ereje buzý faktileri jaıly málim etti, dep habarlaıdy QazAqparat.

«Ótken aptada 15 kúndik issapardan oraldym. Osy ýaqyt ishinde Pavlodar, Qyzylorda, Túrkistan, Almaty, Jetisý oblystary men Shymkent, Almaty qalalarynda ornalasqan 17 testileý ortalyǵyn araladym. Talapkerlermen jáne 40+ gradýstyq ystyqta birneshe saǵat boıy balalaryn jaqsy nátıjemen kútip turǵan ata-analarmen kezdestim. Testileý ortalyqtarynda UBT ótkizý barysyn qadaǵaladym. Osy saparda oqýǵa túsýshiler shaǵym túsiretin ortalyqtardyń jumysyna erekshe kóńil bólindi. Ókinishke qaraı, elimizdiń qasıetti jerinde ornalasqan ortalyqta ereje buzýdyń jappaı jaǵdaılary rastaldy. Tehnologııa damyǵan zamanda akademııalyq adaldyq qaǵıdasyn buzý tásilderin anyqtaý ońaı emes. Qazir testilenýshiler qoldan jazylǵan kómekshi quraldardy paıdalanbaıdy. Tipti smartfondardyń ózi shpargalka retinde qoldanystan shyǵyp jatyr» dep jazdy ortalyq dırektory áleýmettik jelide.

Onyń aıtýynsha, keıbir testileý ortalyqtarynda talapkerler UBT-ny bógde tulǵalardy kómegimen kompıýterge qashyqtan qosylý arqyly tapsyrýǵa tyrysqan.

Tıisti sharalar qabyldanyp, is quzyretti organdarǵa berildi.

«Aqparattyq qaýipsizdik bizdiń erekshe baqylaýymyzda. Anyqtalǵan jaǵdaıdan soń ortalyq qyzmetkerleriniń osy buzýshylyqtarǵa qatysy týraly kúmán týyndady. Sondyqtan qyzmettik tekseris júrgiziledi. Al 100-den astam talapkerdiń nátıjesi qaıta tekserilip jatyr. Ereje buzý anyqtalǵan jaǵdaıda jınaǵan upaılary joıylyp, olar grant konkýrsyna qatysý múmkindiginen aıyrylady. Qurmetti testilenýshiler! UBT-nyń aıaqtalýyna bir-aq apta qaldy. Qazir sizder ekinshi múmkindikterińizdi paıdalanyp jatyrsyzdar. Táýekelge barmaı, UBT-ny sátti aıaqtaýlaryńyzǵa tilektespin» deıdi Rýslan Emelbaev.


Seriktester jańalyqtary

Jańalyqtar

Úrdis

MURAǴAT