Túrkistanda «Qorqyt týraly ańyz» plastıkalyq spektakliniń premerasy ótti
2022 jylǵy 23 mamyr 05:00

Túrkistanda «Qorqyt týraly ańyz» plastıkalyq spektakliniń premerasy ótti

TÚRKІSTAN. QazAqparat - Teatr óneriniń týyndysyn tamashalaýǵa elimizdiń túkpir-túkpirinen óner jáne mádenıet maıtalmandary, zııaly qaýym ókilderi jáne Túrkistan qalasynyń ónersúıer qaýymy qatysty, dep habarlaıdy QazAqparat tilshisi.

«Qorqyt týraly ańyz» plastıkalyq spektaklinde Qorqyt alyp qaraǵashtan oıyp qobyz jasaıdy. Álemdi qobyz únimen áldılegen babamyz, kórgen túsinen shoshyp, ólimnen qashady. Jeruıyq mekendi izdeıdi. «Qaıda barsa da, Qorqyttyń kórine» kezigip, aqyry týǵan jerine - dúnıeniń kindigi sanalatyn Syr-Darııaǵa oralady.

Jazýshy-dramatýrg Ermek Amanshaevtyń lıbrettosy boıynsha qoıylǵan «Qorqyt týraly ańyz» atty plastıkalyq spektaklin belgili reseılik baletmeıster Konstantın Semenov sahnalady. Kompozıtory – daryndy jas kompozıtor Hamıt Shanǵalıev. Kórkemdik jetekshisi – Aınur Kópbasarova.

Qoıylymda keıipker sózi kóp emes, óıtkeni bul – plastıkalyq spektakl. Ózgeshe aıtqanda, artıster oqıǵany, qoıylym keıipkerleriniń ishki sezimderin bı qımyldary arqyly baıandaıdy. Budan bólek, plastıkalyq teatr - adamdar túrli tilde sóılesetin qoǵamǵa arnalǵan, al bı qımyldaryn aýdarmasyz túsinýge bolady.

Qoıylymdy tamashalaǵan Mádenıet jáne sport vıtse-mınıstri Serik Jarasbaev, Túrkistan oblysynyń ákimi Ómirzaq Shókeev Túrkistandy túrki áleminiń mádenı jáne rýhanı ortalyǵyna aınaldyrý jolynda teatrdyń mańyzy zor ekenin aıtyp, óner ujymyna alǵys aıtty.


Jańalyqtar

MURAǴAT