Túrkistan oblysynyń jedel járdem qyzmeti 77 kólikpen tolyqty

TÚRKІSTAN. QazAqparat - Túrkistan oblysynyń medıtsınalyq jedel járdem stansasyna 77 sanıtarlyq kólik berildi. Saltanatty rásimge arnaıy qatysqan oblys ákimi Ómirzaq Shókeev, otandyq óndiristegi jedel járdem kólikteriniń jasaqtalýymen tanysty, dep habarlaıdy QazAqparat tilshisi.

«Koronavırýs indetimen kúres maqsatynda elde medıtsına salasyna úlken kóńil bólinip jatyr. Barlyq eldi mekende osyndaı jańarý bar. Jańa kólikter aýyl turǵyndarynyń medıtsınalyq qyzmetke qoljetimdiligin arttyryp, jedel járdem parkin jańartýǵa múmkindik berip otyr. Osy oraıda, sizderdiń eren eńbekterińiz úshin alǵysymdy bildirgim kelip otyr. Eńbekterińiz halyqqa densaýlyq, qýanysh syılap, tabysty bolsyn»,-dedi Ómirzaq Shókeev.

Óńirdegi jedel járdem kólikteri naýqasqa alǵashqy medıtsınalyq kómek kórsetýge arnalǵan qajetti qural-jabdyqpen tolyq qamtamasyz etilgen.

Mamandandyrylǵan reanımatsııalyq emdik sharalaryn kórsetýge múmkindik beretin avtokólikter portatıvti ókpeni jasandy jeldetý apparaty, defıbrıllıator, elektrokardıograf, reanımatsııalyq kómek kórsetýge arnalǵan chemodan, jyljymaly zembil, pýlsoksımetr, redýktor-ıngalıator jáne elektrsorǵyshtarmen jasaqtalǵan.

Jyl sońyna deıin qosymsha 45 dana sanıtarlyq avtokólikpen jabdyqtaý kózdelgen.

Jalpy, kún saıyn oblystyq jedel járdem stansasynyń 124 brıgadasy shaqyrtýǵa shyǵady. Táýligine ortasha eseppen 2000-ǵa jýyq qońyraý túsýde.

Kelesi jyly brıgada sanyn 150-ge deıin arttyryp, medıtsınalyq jedel járdem qyzmetin odan ári jetildirý josparlanǵan.