Túrkistan oblysynda tabylǵan úńgirden 48 myń jyl burynǵy tirshilik anyqtaldy
2022 jylǵy 2 shilde 15:26

Túrkistan oblysynda tabylǵan úńgirden 48 myń jyl burynǵy tirshilik anyqtaldy

TÚRKІSTAN. QazAqparat – Báıdibek aýdanyndaǵy Boraldaı jerinde júrgizilgen qazba jumystary nátıjesinde 48 myń jyl burynǵy tirshilik anyqtaldy, dep habarlaıdy QazAqparat tilshisi.

QR Ulttyq mýzeıine qarasty ǵylymı-zertteý ortalyǵy júrgizgen qazba jumystary barysynda Qarataý jotasynan buryn-sońdy belgisiz bolyp kelgen 85 úńgir anyqtalǵan. Paleolıt dáýirine tıesili úńgirlerden tas quraldary men adamnyń jaq súıegi de tabylǵan. Solardyń ishinde Báıdibek aýdanyna qarasty Boraldaı taýyndaǵy Tuttybulaq úńgirinen tabylǵan tas ǵasyryna qatysty derektemeler shetelde zerttelip jatyr.

«Ulttyq mýzeıdiń bas ǵylymı qyzmetkeri, tarıh ǵylymdarynyń doktory, akademık Jáken Taımaǵambetov bastaǵan qazaq-orys, qazaq-nemis, qazaq-japon halyqaralyq ekspedıtsııalary jumys istep jatyr. Úńgirden alynǵan topyraq pen ózge de quraldardy zerttegen Germanııadaǵy ortalyqtan súıinshi habar jetti. Onda sheteldik ǵalymdar úńgirden tabylǵan zattardyń qundy jádiger ekendigin rastady», - deıdi Qazaqstan Respýblıkasy Ulttyq mýzeıi baspasóz bóliminiń qyzmetkeri Madına Sabyr.

Aldaǵy ýaqytta arheolog mamandardan jasaqtalǵan ekspedıtsııa Qazaqstan aýmaǵyndaǵy paleolıt eskertkishterin izdestirý, zertteý jumystaryn Túrkistan, Jambyl oblystary men Shyǵys Qazaqstanda jalǵastyrmaq.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT