Túrkistan oblysynda sheneýnik jýrnalısti óltirýge 5 mln teńgege tapsyrys bergen
2022 jylǵy 21 qańtar 13:56

Túrkistan oblysynda sheneýnik jýrnalısti óltirýge 5 mln teńgege tapsyrys bergen

TÚRKІSTAN. QazAqparat - Túrkistan oblysynda sheneýnik jýrnalısti óltirýge tapsyrys bergen. Ol saryaǵashtyq blogerdiń ómirin 5 mln teńgege baǵalaǵan, dep habarlaıdy QazAqparat tilshisi.

Oblystyq PD bastyǵy Qaırat Dálbekovtyń aıtýynsha, búgingi tańda atalǵan qylmysqa qatysy bar degen kúdikpen 5 adam ustalǵan.

Onyń biri - aýdandyq adamı áleýetti damytý bóliminiń basshysy ekeni belgili bolǵan.

«Adam óltirýge oqtalǵan eki kúdikti Shymkentten ustaldy. Olardan zattaı aıǵaq retinde VAZ (2107/21110) markaly 2 avtokólik tárkilendi. Qylmysty oryndaýshylar bul avtokólikterdi qylmys jasaǵany úshin beriletin aqshaǵa satyp alǵan. Sondaı-aq olardan 16 kalıbrli patrondar alyndy. Qazirgi ýaqytta Saryaǵash aýdany turǵyndarynyń biri, ıaǵnı sheneýniktiń osy qylmysqa tapsyrys bergeni anyqtaldy. Ol jýrnalıstiń ómirin 5 mln teńgege baǵalaǵan», - dedi Qaırat Dálbekov.

Aıta keteıik, 3 qańtar kúni Saryaǵash aýdanynda turatyn jýrnalıst Amangeldi Batyrbekovtyń úıine shabýyl jasalyp, onyń balasy jaraqat alǵan bolatyn.

Sol kúni polıtsııa qyzmetkerleri bul jaıtty aýdandyq polıtsııa bólimine tirkep, QR QK 24-99-baptary boıynsha sotqa deıingi tergeýdi bastady.

«Ustalǵan bes adamnyń ishinde sol sheneýnik, onyń qol astynda istegen sonyń jaqyn adamy, tapsyrys bergen adam men eki kúdikti bar. Tapsyrysty oryndaýshylar buryn bizde esepte bolmaǵan. Óz kezeginde tapsyrysty oryndaýshylar izin jasyrý maqsatynda Saryaǵash aýdanynan Shardaraǵa, sodan soń Arys arqyly Shymkentke jetken. Qazir tergeý toby tıisti tergeý amaldaryn júrgizip jatyr. Qylmystyq is aıasynda qajetti protsessýaldyq áreketter iske asyrylýda. Sotqa deıingi tergeý barysynda qylmystyń sebepteri men barlyq mán-jaıy anyqtalady. Sot olardy qamaýǵa sanktsııa berip, kúdiktiler ýaqytsha ustaý ızolıatoryna qamaldy. Bul qylmysqa jýrnalıstiń qyzmeti sebep bolýy múmkin degen boljam bar» - dedi polıtsııa general-maıory.


Jańalyqtar

MURAǴAT