Túrkistan oblysynda qujatsyz kólik aıdaǵan túlekter ustaldy
2022 jylǵy 25 mamyr 18:02

Túrkistan oblysynda qujatsyz kólik aıdaǵan túlekter ustaldy

NUR-SULTAN. QazAqparat – Búgin Túrkistan oblysy polıtsııa departamenti qyzmetkerleriniń arnaıy reıdtik sharasy kezinde qujatsyz kólik aıdap júrgen 3 mektep bitirýshi ustaldy. Bul týraly oblystyq PD baspasóz qyzmeti málim etti, dep habarlaıdy QazAqparat.

«Atap aıtqanda, Jetisaı aýdandyq polıtsııa bóliminiń qyzmetkerleri mektepter men kóshelerde tekserý jumystaryn kúsheıtti. Ásirese, jas túlekterdiń qyzyq qýyp, qandaı da jol erejesin buzbaýy, taý-qyrǵa shyǵamyz dep, apatty jaıttarǵa tap bolmaýy qatań qadaǵalaýǵa alyndy. Nátıjesinde kámelet jasyna tolmaǵan mektep bitirýshi 3 jasóspirimniń qujatsyz avtokólik júrgizgenin anyqtap, olardyń ata-analaryna QR ÁQBtK-niń 612-baby 2-bóligimen hattama toltyryldy. Jasóspirimder aıdaǵan eki kólik reseılik nómirmen bolǵan», - delingen málimdemede.

Sonymen qatar, memlekettik tirkeý nómirinsiz kólik aıdaǵan 2 júrgizýshi QR ÁQBtK-niń 590-baby 1-bóligimen «Kólik quraldaryn paıdalaný qaǵıdalaryn buzý» boıynsha jaýapqa tartyldy.

«Qazirgi tańda 4 avtokólik aıypturaqqa qoıyldy. «Sońǵy qońyraý» kúnine arnalǵan arnaıy reıdtik shara túngi mezgilde de jalǵasady», - dep tolyqtyrady oblystyq PD baspasóz qyzmeti.



Uqsas jańalyqtar

Jańalyqtar

MURAǴAT