Túrkistan oblysynda kásipker on aıda 31 tonna et óndirdi

MAQTAARAL AÝDANY. QazAqparat – Túrkistan oblysy Maqtaaral aýdanynda 150-ge jýyq mal bordaqylaý alańdary jumys isteıdi, dep habarlaıdy QazAqparat.

Solardyń biri – «Qudaıbergen» sharýa qojalyǵy. Sharýa qojalyqtyń ıesi Tystybaı Syraılovtyń 2,5 gektar aýmaqty alyp jatqan jáne quny 120 mıllıon teńgeni quraıtyn fermasy bar. Onyń ishinde 400 mal basqa arnalǵan qora-jaıy daıyndalyp, jem-shóp saqtaıtyn qoımasynyń qurylysy aıaqtalǵan. Jeke menshigindegi 10 gektar egistik jerinen jońyshqa egip, qazirgi tańda ónimin jınap alǵan. Jeke kásipkerdiń endigi maqsaty – mal basyn kóbeıtý úshin úlken kólemde nesıe alyp, et ónimin eksportqa deıin shyǵarý.

Memlekettiń qoldaýynyń arqasynda T.Syraılov qazirgi tańda «Agrarlyq nesıe korparatsııasy» aktsıonerlik qoǵamynan «Qarapaıym zattar ekonomıkasy» baǵdarlamasy aıasynda mal bordaqylaý alańyna 29,4 mıllıon teńge nesıe alyp, jumys júrgizip jatyr. Osylaısha, oblys ákiminiń tapsyrmasyna sáıkes, jeke kásipker 1000 bastyq mal bordaqylaý fermasyn salý jobasyna qatysýda.

Aıta keteıik, aýdandyq «Altyn kúz – 2019» aýyl sharýashylyǵy qyzmetkerleriniń is-sharasynda aýdan ákimi Baqyt Asanov T.Syraılovty «Ozat mal bordaqylaýshy» nomınatsııasy boıynsha marapattady. Keıipkerimiz 10 aıdyń qorytyndysy boıynsha 31,5 tonna et óndirgen.