Jańalyqtar  >

Túrkistan oblysynda egistik jer kóleńkeli bóliske túsip jatyr –depýtat

2022 jylǵy 30 qarasha, 16:58
Túrkistan oblysynda egistik jer kóleńkeli bóliske túsip jatyr –depýtat

ASTANA. QazAqparat – Májilis depýtaty Fahrıddın Qarataev Bas prokýrorǵa Túrkistan oblysyndaǵy jer resýrstary salasynda tirkelgen zańdyqtar týraly depýtattyq saýal joldady, dep habarlaıdy QazAqparat tilshisi.

«Aýyl sharýashylyǵy mınıstrliginiń málimetine súıensek Túrkistan oblysy Saıram aýdanynyń ákimdigimen «Farhat» sharýa qojalyǵyna Qarasý aýyldyq okrýgi aýmaǵynan egistik jeri berilgen. Al, «Farhat» sharýa qojalyǵynyń oǵan berilgen egistik jerdi 17 bólikke, ary qaraı 42 jer ýchaskege bólgeni anyqtalǵan.

Taǵy bir aıta ketetin másele, «Saıram» óndiristik kooperatıvi ýaqytsha paıdalaný quqyǵymen berilgen jerdi 7 bólikke bólip berý týraly ótinimimen Shymkent qalasyndaǵy tıisti jergilikti atqarýshy organǵa júgingen. Shymkent qalasynyń tıisti ýákiletti organy jalǵa alý kelisim shartyn jasamastan, Jer kodeksiniń normalaryn óreskel buza otyryp, egistik jerdi jer ýchaskelerine bólýdi buıryǵymen bekitken.

Osyndaı jaǵdaılar bir ǵana oqıǵa emes, barlyq óńirlerde kóptep kezdesýde», - dedi depýtat.

Aıtýynsha, osynyń saldarynan halyq arasynda «Nahalovka» atanǵan eldi mekender, kósheler paıda bolyp jatqan kórinedi.

«Osylaısha eshqandaı ınfroqurylymsyz, arhıtektýralyq, qaýipsizdik talaptaryna saı kelmeıtin eldi mekender boı kóterýde.

«Amanat» partııasy mańyzdy máselelerdi sheshý úshin barlyq múddeli bılik organdarynyń dıalogyn qoldaıtyndyǵyn eskere otyryp, tómendegini usynamyz:

1. Aýyl sharýashylyǵy, Ádilet mınıstrlikterimen jáne Bas prokýratýramen birlesip aýyl sharýashylyǵy jerleriniń nysanaly maqsatyn ózgertýdi jáne tıisti laýazymdy tulǵalarǵa jaýapkershilik júkteýdi retteıtin Jer kodeksi baptarynyń quqyq qoldaný praktıkasy máselelerin zerdeleý úshin arnaıy jumys tobyn qurýdy;

2. Jer kodeksiniń baptaryn buzǵan jaýapty tulǵalardy anyqtap, olardy jaýapkershilikke tartý máselesin qaraýdy;

3. Óńirlerde jer resýrstaryn berý týraly aqparattyń ashyqtyqtyǵy men jalpyǵa qoljetimdiligin qamtamasyz etýge yqpal jasaýdy usynamyz», - dedi Fahrıddın Qarataev.


Seriktester jańalyqtary

Jańalyqtar