Túrkistan oblysynda 25 jyl buryn joǵalǵan turǵyn tabyldy
2022 jylǵy 28 qańtar 12:59

Túrkistan oblysynda 25 jyl buryn joǵalǵan turǵyn tabyldy

TÚRKІSTAN. QazAqparat - Túrkistan oblysy Polıtsııa departamenti krımınaldyq polıtsııa basqarmasynyń qyzmetkerleri jedel áreket etip, bir kúnniń ishinde bir-birin 25 jyl kórmegen baýyrlardy qaýyshtyrdy, dep habarlaıdy QazAqparat tilshisi.

Polıtsııa qyzmetkerlerine habarlasqan jergilikti turǵyn Tólebı aýdanyndaǵy aýyldardyń birinde belgisiz azamattar jas jigitti quldyqta ustap otyrǵany týraly habar bergen. Atalǵan jaıtty polıtseıler QR QK 126-baby «Zańsyz bas bostandyǵynan aıyrý» boıynsha Túrkistan oblysy PD-ǵa tirkedi.

Aqparat alysymen departament qyzmetkerleri barlyq qajetti tergeý áreketterin shuǵyl atqaryp, jábirlenýshige kómek kórsetken.

Polıtseıler jábirlenýshiniń ata-anasy kishkentaı kezinde qaıtys bolǵanyn, sodan ol balalar úıinde, keıinnen ınternatta tárbıelengenin anyqtaǵan. Er jetken soń, 10 jyl boıy oblys aýdandaryndaǵy túrli sharýashylyqtarda jaldamaly jumysshy bolǵan jáne jumys berýshiler tarapynan azap kórgeni belgili boldy. Sondaı-aq jas jigittiń esinde óziniń jaqyn týystary múldem saqtalmaǵan eken.

Birneshe saǵat boıy jan-jaqty júrgizilgen is-sharalar nátıjesinde polıtseıler, Túrkistan qalasynyń janyndaǵy Saýran aýdanynda turatyn jas jigittiń týystaryn tapty. ıAǵnı, polıtseıler, jas jigittiń úlken ápkesi men jezdesin Polıtsııa departamentine alyp keldi. Munda bir-birinen kóz jazyp qalǵan aǵaıyndylardyń kópten kútken kezdesýi ótti. Baýyrlar uzaq jyldardan keıingi tabysý kezinde, qýanyshtyń kóz jasyn jasyra almady.

Áıel birneshe jyl boıy joǵalǵan inisin ózdiginen izdep, taba almaǵan. Baýyrymen qaýyshqan ápkesi Botakóz Qudaıbergenqyzyna aıtýynsha, olardyń ata-analary bala kezde qaıtys bolǵan. Al týys aǵasy, onyń eki baýyryn balalar úıine ótkizgen. Sol kezde úlkeni 9 jasta, kishisi 4 jasta eken. Keıinnen eń kishisi joǵalyp, habarsyz ketken. Sodan inisin tabýǵa 2020 jyldan bastap kirisken. Alaıda polıtsııanyń kómegine júginbegen, múldem aryzdanbaǵan. Esesine, Túrkistan oblysynyń polıtseıleri Botakózge habarlasyp, inisin tapqany týraly jaǵymdy jańalyq jetkizdi.

«Rızamyz, Polıtseılerge myń rahmet. Bala kezde kóz jazyp qalǵan baýyrymdy taýyp berdi. Іnimdi kórip, ózimdi ómirdegi eń baqytty jan sezinip otyrmyn. Alla razy bolsyn sizderge. 25 jyl boıy osy sátti qansha armandap, kúttim. Búgin mine aman-esen, jigit bolǵan inimmen kezdestim. Qýanyshymda shek joq!», - dep kózine jas aldy Botkóz Tolybaeva.

Qazirgi kezde tergeý jumystary júrip jatyr.


Jańalyqtar

MURAǴAT