Túrkistan oblysyna bólingen kómirdiń kórshi memleketke satylyp jatqany ras pa

2023 jylǵy 26 qańtar, 21:53
Túrkistan oblysyna bólingen kómirdiń kórshi memleketke satylyp jatqany ras pa

TÚRKІSTAN. QazAqparat – Túrkistan oblysyna bólingen kómir qory kórshi memleketke satylyp jatqan joq. Túrkistan oblysy boıynsha memlekettik kirister departamentine qarasty kedendik ákimshilendirý basqarmasynyń basshysy Serik Málikov osylaı dep málimdedi, dep habarlaıdy QazAqparat tilshisi.

Túrkistan oblysynda týyndaǵan kómir tapshylyǵyna qatysty el ishinde kóptegen boljamdar aıtylyp jatyr.

Tipti, Túrkistan oblysyna bólingen kómir qory kórshi Ózbekstan memleketine satylyp jatyr degende qaýeset tarap jatyr.

Túrkistan óńirlik kommýnıkatsııa qyzmetinde ótken brıfıngte sala mamandary Túrkistan oblysyna bólingen kómirdiń kórshi memleketke saýdalanyp jatqany týraly saýalǵa jaýap berdi.

Túrkistan oblysy boıynsha memlekettik kirister departamentine qarasty kedendik ákimshilendirý basqarmasynyń basshysy Serik Málikovtiń aıtýynsha, Túrkistan óńirinde shetelge kómir tasymaldaıtyn operator tirkelmegen.

«Byltyr jaýapty mınıstrlik tarapynan 30 qyrkúıekten bastap shetelge avtokólikpen kómir tasymaldaýǵa tyıym salynǵan. Al temirjolmen shyǵarýǵa múmkindik bar. Ótken jylǵy 30 qyrkúıekten beri Qazaqstannan Ózbekstanǵa 210 myń tonnadan astam kómir eksporttalǵan. Aıta ketetin másele – kómirdi eskporttaýshy kompanııalar Qaraǵandy, Pavlodar, Ulytaý oblystaryna tirkelgen jáne kedendik rásimdi sol óńirlerde resimdegen. Túrkistan oblysy aýmaǵynda kómir eksporttaıtyn salyq tóleýshiler tirkelmegen jáne memlekettik kirister departamentinde resimdelmegen, – dedi ol.

Aıta keteıik, budan aldyn Túrkistan oblysy ákiminiń birinshi orynbasary Arman Jetpisbaı Túrkistan oblysynda kómir tapshylyǵy joq ekenin málimdegen bolatyn.


Uqsas jańalyqtar
Seriktester jańalyqtary

Jańalyqtar