Jańalyqtar  >
  Qoǵam
Túrkistan men Býrabaıda Ortalyq Azııa volonterleriniń alǵashqy forýmy ótip jatyr
2022 jylǵy 17 tamyz 12:41

Túrkistan men Býrabaıda Ortalyq Azııa volonterleriniń alǵashqy forýmy ótip jatyr

NUR-SULTAN. QazAqparat – Qazaqstanda Ortalyq Azııa volonterleriniń alǵashqy forýmy ótip jatyr. Bul týraly QR Aqparat jáne qoǵamdyq damý mınıstrligi Azamattyq qoǵam isteri komıtetiniń tóraǵasy Madııar Qojahmet aıtyp berdi, dep habarlaıdy QazAqparat tilshisi.

15-17 tamyz aralyǵynda Túrkistan men Býrabaıda forýmǵa qatysýshylar salany damytý, Ortalyq Azııadaǵy volonterlikke tyń serpin berý joldaryn pysyqtap, ıdeıalar men usynystar jınaqtap jatyr.

«Bul forým bes kúnge sozylady, Ortalyq Azııa memleketteriniń volonterlik salasyndaǵy sarapshylarynyń úlken jıyny ótedi. Negizgi másele – BUU Bas Assambleıasynyń 75-sessııasynda Prezıdentimiz Qasym-Jomart Toqaev kótergen bastamany ári qaraı ilgeriletý maqsatynda sharalar uıymdastyrý, onyń negizgisi – volonterlerdi jumyldyrýdyń halyqaralyq jylyn jarııalaý týraly jumys júrgizý. Sodan keıin forýmnyń ekinshi bóligi Nur-Sultan qalasynda ótedi, barlyq óńirlerden jáne atalǵan elderden qatysýshylar jınalady. Bul jaqta eki kúnge arnalǵan baǵdarlama ázirlengen, onyń sheńberinde turaqty damý maqsattary boıynsha belgili sarapshylardyń qatysýymen sessııalar ótkizý josparlanǵan», - dedi Madııar Qojahmet ortalyq kommýnıkatsııalar qyzmetinde ótken baspasóz máslıhatynda.

Forýmnyń sońǵy kúni QR Parlamenti Senaty tóraǵasynyń qatysýymen plenarlyq otyrys ótip, elimizdiń jáne Ortalyq Azııa elderiniń tanymal volonterleri prezentatsııa jasaıdy.

«Qorytyndy kúni BUU Eriktiler baǵdarlamasynyń álemdegi volonterliktiń jaı-kúıi týraly baıandamasy usynylady. Qazirgi ýaqytta Syrtqy ister mınıstrligi men BUU keńsesi aıasynda Prezıdent bastamasyn ilgeriletý jumystary júrip jatyr. Bul ıdeıa túrli halyqaralyq dıalog alańdarynda, atap aıtqanda Reseıde, Taılandta, Qytaıda, Túrkııada, Latvııada jáne basqa elderde ótetin sharalarda kóterildi. Qazirgi tańda Qazaqstan volonterleri BUU túrli qurylymdarynda belsendi jumys istep júr. Onyń ishinde 7 volonter QR qoldaýymen shet elderde óziniń volonterlik mıssııasyn atqaryp jatyr. Osyndaı sharalar nátıjesinde elimizdiń volonterlik salasynyń qarqyndy damýyn kórsetýge tyrysamyz», - dedi Madııar Qojahmet.

Sonymen birge, Ortalyq Azııa volonterler korpýsyn nemese arnaıy hab qurý qarastyrylady. Bul habtyń jumysy jedel aqparat almasýǵa, tótenshe jaǵdaılar, ekologııa, salaýatty ómir saltyn qalyptastyrý boıynsha jumys tájirıbesimen almasýǵa baǵyttalady.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT