Túrkistan qalasynda 12 qabatty 39 úıdiń qurylysy júrýde
2022 jylǵy 28 qańtar 11:30

Túrkistan qalasynda 12 qabatty 39 úıdiń qurylysy júrýde

TÚRKІSTAN. QazAqparat – Túrkistan qalasynda boı kótergen 12 qabatty 39 úıdiń qurylysy naýryz aıynda tolyq aıaqtalady, dep habarlaıdy QazAqparat tilshisi.

Búginde 7 qabatty 15 úıdiń qurylysy aıaqtalyp, satylymǵa shyǵarylǵan. Baspanaǵa qoljetimdilikti arttyrý maqsatynda Túrkistan qalasyndaǵy ákimshilik-iskerlik ortalyǵy aýmaǵyndaǵy kópqabatty turǵyn úılerdiń páteri «Otbasy bank» arqyly jáne «7-20-25» baǵdarlamasy arqyly turǵyndarǵa usynylady. Byltyr jalpy alańy 600 myń sharshy metrden asatyn turǵyn úı paıdalanýǵa berildi. Oblys ortalyǵynda qazirgi tańda bıýdjet esebinen 7, 9 jáne 12 qabatty 67 turǵyn úıdiń qurylysy júrýde.

«Qazirgi tańda Túrkistan qalasynda 200-den astam jańa nysan men ǵımarattyń qurylysy júrip jatyr. Investıtsııalyq jobalardyń sany artýda. Qurylys kompanııa basshylarymen kezdesýdiń mańyzdylyǵy belgili. Jańa nysandardyń talapqa saı salynyp, óz merziminde tapsyrylýyna kúsh salamyz», – dedi oblys ákimi Ómirzaq Shókeev.

Óńirde turǵyndardy baspanamen qamtý baǵytynda aýqymdy jumys qolǵa alynyp otyr. Turǵyn úılerdiń qurylysy da talapqa saı júrip jatyr. Jańadan boı kótergen úılerdiń aýlasyna balalar alańqaılary salynyp, abattandyrý jumystary qatar júrgizilýde.

Merdigerlermen kezdesken Túrkistan oblysynyń ákimi Ómirzaq Shókeev olarǵa qurylys jumystaryn belgilengen kestege sáıkes, merziminde aıaqtaýdy tapsyrdy. Baspananyń sapasyn basty nazarda ustaýdy eskertip, abattandyrý jumystarynyń barysyna mán berdi.



Jańalyqtar

MURAǴAT