«Tumar-2022» ulttyq syılyǵynyń jeńimpazdary anyqtaldy
2022 jylǵy 28 maýsym 20:06

«Tumar-2022» ulttyq syılyǵynyń jeńimpazdary anyqtaldy

NUR-SULTAN. QazAqparat – Elordada «Tumar-2022» ulttyq televızııalyq syılyǵynyń jeńimpazdary marapattaldy, dep habarlaıdy QazAqparat tilshisi.

Televızııalyq sheberlik úshin beriletin «Tumar-2022» ulttyq syılyǵynda 10 nomınatsııa bar. Bıyl syılyq alýǵa 300-ge jýyq ótinim kelip túsken, eń kóp ótinim «Úzdik derekti fılm», «Úzdik aqparattyq baǵdarlama», «Úzdik áleýmettik joba», «Úzdik telejýrnalıst», «Úzdik telejúrgizýshi» nomınatsııalary boıynsha qabyldanǵan.

Eń aldymen QR Premer-Mınıstriniń orynbasary Eraly Toǵjanov «Úzdik derekti fılm» atalymynyń jeńimpazyn jarııalady. Munda «ATYRAY» telearnasy túsirgen «Kaspııden ketken qypshaqtar» fılmi top jardy.

«Úzdik aqparattyq baǵdarlama» júldesine ASTANA TV telearnasynyń «Saraptimes» baǵdarlamasy laıyq dep tanyldy. Músinsheni Nur-Sultan qalasynyń ákimi Altaı Kólginov tabystady.

«Úzdik áleýmettik joba» atalymynda «KTK» telearnasynyń «Daý-damaısyz» jobasy kósh bastady. Ony Prezıdent Teleradıokesheniniń Bas dırektory Raýshan Qajybaeva tabys etti.

«Úzdik tok-shoý» júldesin jýrnalıst Kemelbek Oıshybaev berdi, bul júldeni «Atameken Business» telearnasynyń «Vremıa govorıt» jobasy jeńip aldy.

«Úzdik oıyn-saýyq baǵdarlamasy» atalymynda «Almaty» telearnasy ázirlegen «Almaty Bala Fest» jobasy úzdik atandy. Júldeni QR Parlamenti Senatynyń depýtaty Dana Nurjigit tapsyrdy.

«Úzdik televızııalyq serıal» syılyǵyn tabystaý úshin sahhnaǵa «Ekspress-K» gazetiniń bas redaktory Aleksandr Aksıýtıts shaqyryldy. Munda qazylar alqasynyń sheshimimen «Qazaqstan» ulttyq telearnasy túsirgen «Ahmet. Ult ustazy» úzdik serıal atandy.

Sonymen birge, aımaqtar arasynda «Turkistan» telearnasy «Úzdik aımaqtyq telearna» atandy. Bul syılyqty AMANAT partııasynyń Atqarýshy hatshysy Ashat Oralov berdi.

«Úzdik rejısserlik jumys» nomınatsııasynda «Qazaq TV» telearnasynyń «Jena» jobasy top jardy.

«Úzdik telejýrnalıst» júldesin QR Parlament Májilisiniń depýtaty Darhan Myńbaı tabys etti. Munda «Habar 24» telearnasynyń Ońtústik Koreıadaǵy menshikti tilshisi Vladıslav Tsoı jeńimpaz atandy. V. Tsoı saltanatty marapattaý keshine Seýlden tikeleı efırge shyqty.

Kesh sońynda «Úzdik telejúrgizýshi» atalymynda «31 arna» telejúrgizýshisi Asqar Meńdibaev jeńimpaz atandy. Júldeni QR Aqparat jáne qoǵamdyq damý mınıstri Asqar Omarov tabystady.

Sondaı-aq «Ádil qazy alqasynyń arnaıy syılyǵy» «Balapan» telearnasyna berildi. Arnaıy syılyqty tabystaý mártebesi Erlan Qarınge berildi.

Aıta keteıik, «Tumar» júldesin marapattaý keshinde «Balalar jylyna» erekshe mán berildi. Keshti balalar júrgizdi jáne barlyq jeńimpazdar balalarmen sahnaǵa shyqty.

Aıta keteıik, «Tumar» ulttyq televızııalyq báıgesi 2017 jyly Qazaqstan Respýblıkasy Aqparat jáne qoǵamdyq damý mınıstrliginiń bastamasymen qurylǵan. Syılyq jeńimpazdary qazaqstandyq televızııany damytýǵa qosqan úlesi úshin «Tumar» músinshesi men 1 mıllıon teńge kóleminde aqshalaı syıaqy alady.


Seriktester jańalyqtary

Jańalyqtar

Úrdis

MURAǴAT