Jańalyqtar  >
  Sport

Túlkibastyq ustaz asyq atýdan álem kýbogyn jeńip aldy

2022 jylǵy 1 qazan, 13:10
Túlkibastyq ustaz asyq atýdan álem kýbogyn jeńip aldy

TÚRKІSTAN. QazAqparat - Túlkibastyq ustaz asyq atýdan álem kýbogynyń ıegeri atandy, dep habarlaıdy QazAqparat tilshisi.

Túrkistan oblysy Túlkibas aýdanynyń turǵyny Almas Qarabaev asyq atýdan álem chempıonatyna qatysyp keldi.

Rýmynııa jerinde ótken baıraqty básekede el namysyn qorǵaǵan mektep muǵalimi eshqandaı qarsylas shaq keltirmedi.

«Bes asyqtan Qazaqstan quramasy jalpykomandalyq esepte birinshi oryndy ıelendik. Úlken sheńber ishindegi asyqty alystan atyp, sheńberden shyǵarý kerek boldy. Bizdiń komandaǵa bul oıyn esh qıyndyq týdyrmady» - deıdi ol.

Almas T.Rysqulov aýylynda ornalasqan A.S.Pýshkın atyndaǵy aqparattyq tehnologııalar mektep lıtseıinde dene shynyqtyrý páninen sabaq beredi.

Bos ýaqytynda balalardy asyq atý oıynyna baýlyp, qyr-syryn úıretedi.

Jarystarǵa alyp baryp, shyńdaıdy. Shákirtteri de senimdi aqtap álemdik dodalarda top jaryp, jeńimpaz atanyp júr.

«Bala kezimizden asyq oınap óstik. Keıinnen mektep bitirgen soń Shymkent áleýmettik pedagogıkalyq ýnıversıtetin bitirdim. 2015 jyldan bastap asyq oınaýdy qaıta qolǵa aldym. 2019 jyly aýyl mektebine muǵalim bolyp qyzmetke ornalasyp, shákirt daıyndaýdy bastadym. Qazir 14 shákirtim bar. Onyń 11 ul, 3 qyz bala. Nátıjeleri kóńil qýantarlyqtaı» - deıdi ol.

Almas - asyq atýdan sport sheberi. Ózi de jarystarǵa qatysyp, júldeli oryndardy ıelenip keledi.

Atap aıtar bolsaq, Qyzylorda, Shymkent, Almaty qalalarynda ótken Qazaqstan kýbogynyń chempıony, Oral, Petropavl, Taraz, Kókshetaý qalalarynda ótken QR chempıonatynyń kúmis júldegeri, Qyrǵyzstan Respýblıkasynda ótken dúnıejúzilik kóshpendiler oıynynyń qola medal ıegeri.

Sondaı-aq, bıyl Rýmynııa elinde ótken álem kýbogynyń jeńimpazy atandy.

«Búginde kóptegen jastar asyq oınaýǵa qumartpaıdy. Yntasy joq. Odan qaıta uıaly telefon shuqylap, áleýmettik jelide otyrǵandy qup kóredi. Biz sonda da jastardyń qyzyǵýshylyǵyn oıatyp, ulttyq sporttyq oıyndy nasıhattap kelemiz» - deıdi ustaz.


Tegı:
Seriktester jańalyqtary

Jańalyqtar