Toı-jıyndy, negizsiz bas qosý men qydyrýdy ýaqytsha toqtatý kerek – Eraly Toǵjanov
2022 jylǵy 18 qańtar 18:38

Toı-jıyndy, negizsiz bas qosý men qydyrýdy ýaqytsha toqtatý kerek – Eraly Toǵjanov

NUR-SULTAN. QazAqparat – QR Premer-Mınıstriniń orynbasary Eraly Toǵjanov koronavırýstyń órshýine baılanysty toı-jıyndy, otbasylyq merekelerdi, negizsiz bas qosý men qydyrýdy ýaqytsha toqtatýǵa shaqyrdy, dep habarlaıdy QazAqparat tilshisi.

«Qurmetti azamattar! Búginde eldegi qoǵamdyq-saıası jaǵdaı turaqtaldy. Qalpyna keltirý jumystary júrip jatyr. Alaıda koronavırýs indeti órship barady. Sondyqtan maska kııý, áleýmettik qashyqtyqty saqtaý jáne t. b. aldyn alý sharalaryn qoldaný qajet. Toıdy, jıyndy, otbasylyq merekelerdi, negizsiz bas qosýdy, qydyrýdy ýaqytsha toqtatý kerek. Aýrý adamdar oqshaýlaný kerek. Bul – búgingi kúnniń, búgingi jaǵdaıdyń talaby. Bul – aınaladaǵy siz jaqsy kóretin adamdarǵa qaýip tóndirmeýdiń joly! Bul – jalpy sanaly qoǵamnyń ár azamatynyń moınyna alatyn jaýapkershiligi», - dedi E. Toǵjanov Ortalyq kommýnıkatsııalar qyzmetinde.

Premer-Mınıstr orynbasary sanaly qoǵamnyń jaýapty adamdardan quralatynyn atap ótti. Áleýmettik jaýapkershilikke ákeletin qoǵamdyq sana, sanaly qoǵam qalyptastyrýǵa ár azamat óz úlesin qosýy kerek.

«Aýyryp em izdegenshe, aýyrmaıtyn jol izdeıik, aǵaıyn! Osy rette Úkimet tarapynan bıznes sýbektileriniń jumysyna kedergi kelmeýi úshin barynsha sharalar qabyldanyp otyr. Sondyqtan Ashyq jobasyn sizder men bizderdiń amandyǵymyz, saýlyǵymyz úshin ári qaraı damyta berýimiz kerek. Barlyq qoldanylyp jatqan sharalar halqymyzdyń densaýlyǵyn qorǵaýǵa baǵyttalǵanyn taǵy da atap ótemin. Bizdiń baqytymyzdyń onnan toǵyzy densaýlyǵymyzǵa baılanysty. Sondyqtan, qurmetti qazaqstandyqtar, sizderge jáne jaqyndaryńyzǵa densaýlyq tileımin», - dedi E. Toǵjanov.


Jańalyqtar

MURAǴAT