Tórt aıdan keıin tennıske qaıta oraldym – Zarına Dııas
2022 jylǵy 19 mamyr 16:09

Tórt aıdan keıin tennıske qaıta oraldym – Zarına Dııas

NUR-SULTAN. QazAqparat – Tennısten Qazaqstan ulttyq quramasynyń múshesi Zarına Dııas tórt aı úzilisten keıin sportqa oralǵanyn málim etti. Ol óziniń kortta qaıta óner kórsete alatynyna baqytty ekendigin jetkizdi, dep habarlaıdy QazAqparat tilshisi.

«Densaýlyǵymdaǵy kinárattan arylyp, tennıs kortyna qaıta shyǵýym – men úshin kishkentaı bolsa da jeńis. Aldaǵy ýaqytta jumys kóp. Udaıy jattyǵýdan keıin jýyrda ózimniń úzdik qalpyma kelemin dep oılaımyn. Osy kezde qoldaý bildirip, jyly sóz aıtqan jankúıerlerimniń bárine alǵysymdy aıtamyn. Bul sporttyq jolymdaǵy qıyndaý kezeńde maǵan qanat bitirdi», - dedi Zarına Dııas.

Bıyl 29 jasqa tolatyn Zarına Dııas jyl basyndaǵy Aýstralııa ashyq chempıonatynan keıin jaraqat alyp qalyp, tórt aıdaı oınaǵan joq. Birneshe kún buryn qazaqstandyq tennısshi Rolan Garros týrnıriniń irikteý saıysynda qarsylasyna jol berdi.

2015 jyly dúnıejúzilik reıtıngide 31-orynǵa deıin kóterilgen Z. Dııas qazirgi kezde 131-satyda tur. 2017 jyly Tokıo jarysynyń jeńimpazy atanǵan Zarınaǵa úzdik júzdikke oralý úshin aldaǵy dodalarda sátti óner kórsetýi kerek-aq.

Eske sala keteıik, budan buryn qazaqstandyq tennısshiniń Shymkent týrnıriniń jartylaı fınalyna ótkenin jazǵan bolatynbyz.


Jańalyqtar

MURAǴAT