Torǵaı aýylynda Ahmet Baıtursynuly men Mirjaqyp Dýlatulyna eskertkish ornatylmaq
2022 jylǵy 22 maýsym 15:30

Torǵaı aýylynda Ahmet Baıtursynuly men Mirjaqyp Dýlatulyna eskertkish ornatylmaq

NUR-SULTAN. QazAqparat – Qostanaı oblysyna qarasty Torǵaı aýylynda Ahmet Baıtursynuly men Mirjaqyp Dýlatulyna eskertkish ornatý máselesi pysyqtalyp jatyr. Bul týraly Qostanaı oblysynyń ákimi Arhımed Muhambetov aıtty, dep habarlaıdy QazAqparat tilshisi.

«Alash arysy Ahmet Baıtursynulynyń mereıtoıyna arnalǵan josparǵa sáıkes Jangeldın aýdany turǵyndarynyń turmysyn jáne ál-aýqatyn jaqsartý baǵytynda ınfraqurylymdyq jobalar iske asyrylýda. Mysaly, jýyrda ǵana Aqkól, A.Baıtursynov aýyldary mobıldik ınternet jelisine qosyldy. Bul – mereıtoıǵa ázirlik barysynda jergilikti halyqtyń suraǵan negizgi ótinishteriniń biri bolatyn. Jergilikti turǵyndardyń suraýy boıynsha A.Baıtursynuly aýylyna aparatyn joldyń jáne Torǵaı ózeni arqyly ótetin kópirdiń jóndeý jumystary bastalyp ketti. Sonymen qatar, A.Baıtursynuly aýylyna jańadan medıtsınalyq pýnkt salynyp, Aqkóldegi aýyldyq ambýlatorııa jóndeýden ótkiziledi. Jospar aıasynda Torǵaı aýylyndaǵy «Ahmet Baıtursynuly men Mirjaqyp Dýlatulynyń ádebı mýzeıine» jóndeý jáne reekspozıtsııa jumystary júrgizilýde», - dedi óńir ákimi Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, Sarytúbek qonysyndaǵy «Ahmet Baıtursynuly mýzeı-úıin» salý jumystary da qatań baqylaýǵa alyndy. Qazirgi tańda jańa nysannyń jobalyq smetalyq qujattamasy saraptamadan ótkizilýde. Qurylys jumystaryna oblys bıýdjeti esebinen qosymsha qarajat bólinetin bolady. Konkýrstyq rásim nátıjesi boıynsha jaýapty merdiger tabylsa, úıdiń qurylysyn qyrkúıekke deıin aıaqtaý josparlanǵan.

«Búgingi kúni jergilikti halyq, kásipkerlerdiń demeýshiligimen Baıtursyn áýletiniń qorymy janynan kesene salynyp, Torǵaı aýylynda Ahmet pen Mirjaqyp babalarymyzdyń qurmetine jańa eskertkish ornatý máselesi pysyqtalýda. Budan bólek mádenı, ǵylymı, tanymdyq is-sharalar uıymdastyrylyp jatyr. Spektaklder qoıylyp, ǵylymı ekspedıtsııa óz jumysyn bastady. Negizgi mereıtoılyq is-sharalar 3-5 qyrkúıek aralyǵyna josparlanǵan», - dedi Arhımed Muhambetov.


Uqsas jańalyqtar

Jańalyqtar

Úrdis

MURAǴAT