Toqaev QR áskerıleriniń BUU bitimgerlik mıssııalaryna qatysý geografııasyn keńeıtý jospary týraly aıtty
2021 jylǵy 29 qarasha 23:43

Toqaev QR áskerıleriniń BUU bitimgerlik mıssııalaryna qatysý geografııasyn keńeıtý jospary týraly aıtty

JENEVA. QazAqparat - Memleket basshysy Qasym-Jomart Toqaev Jenevada Halyqaralyq Qyzyl Krest komıtetiniń prezıdenti Peter Maýrermen kezdesti, QazAqparat bul týraly Aqordaǵa silteme jasap habarlaıdy.

Kezdesý barysynda Qazaqstan men Halyqaralyq Qyzyl Krest komıteti arasyndaǵy yntymaqtastyqty nyǵaıtýdyń perspektıvalary talqylandy. Sondaı-aq halyqaralyq jáne aımaqtyq kún tártibindegi ózekti máseleler boıynsha oı-pikirler ortaǵa salynyp, Aýǵanstandaǵy gýmanıtarlyq jaǵdaı sóz boldy.

Repatrıatsııa jáne reıntegratsııa, otbasylardyń qaýyshý jáne qaqtyǵys aımaqtarynan oralǵan azamattarǵa psıhologııalyq kómek kórsetý máseleleri boıynsha elimiz ben Komıtet arasyndaǵy ózara tabysty yqpaldastyq atap ótildi.

Qasym-Jomart Toqaev Komıtettiń qyzmetin tolyq qoldaıtynyn naqtylap, osy uıymnyń basshysy laýazymyndaǵy Peter Maýrerdiń atqaryp jatqan jumysyn joǵary baǵalady.

Memleket basshysy Halyqaralyq Qyzyl Krest komıtetine Qazaqstannyń Qorǵanys mınıstrligimen bitimgerlik operatsııalar júrgizý máseleleri boıynsha ózara tabysty yqpaldastyǵy úshin rızashylyǵyn bildirdi. Qasym-Jomart Toqaev qazaqstandyq áskerılerdiń BUU-nyń bitimgerlik mıssııalaryna qatysý geografııasyn keńeıtý jospary týraly aıtty.

Peter Maýrer Qasym-Jomart Toqaevqa kezdesýge múmkindik bergeni úshin alǵys bildirip, Komıtettiń qazirgi qyzmeti men jospary jóninde málimet berdi. Sondaı-aq elimizdiń aýǵan halqyna gýmanıtarlyq kómek kórsetý jónindegi kúsh-jigerin joǵary baǵalady.

Eske salaıyq, 28 qarashada Qazaqstan Prezıdenti Q.Toqaev resmı saparmen Shveıtsarııa konfederatsııasyna keldi.

Búgin Jenevada Qasym-Jomart Toqaev Shveıtsarııanyń Federaldyq Prezıdenti Gı Parmelanmen kelissóz júrgizedi, Dúnıejúzilik densaýlyq saqtaý uıymynyń basshysymen kezdesti, DDSU-nyń Dúnıejúzilik densaýlyq saqtaý assambleıasynyń arnaýly sessııasyna qatysty, sondaı-aq Investıtsııalyq dóńgelek ústel otyrysyna qatysty. Budan bólek, Memleket basshysy BUU-nyń Jenevadaǵy bólimshesiniń Bas dırektory Tatıana Valovaıamen kezdesti.


Jańalyqtar

MURAǴAT