Tennısshi Grıgorıı Lomakın Mılanda jarystyń birinshi raketkasyn utty
2022 jylǵy 21 maýsym 22:20

Tennısshi Grıgorıı Lomakın Mılanda jarystyń birinshi raketkasyn utty

NUR-SULTAN. QazAqparat – Qazaqstandyq Grıgorıı Lomakın juptyq synda Mılan chelendjer týrnıriniń shırek fınalyna shyqty, dep habarlaıdy QazAqparat tilshisi.

Qazaqstan tennıs federatsııasynan málim etkenindeı, G.Lomakın ýkraınalyq Vladıslav Manafovpen birge bastapqy kezdesýin jarystyń birinshi raketkalary, amerıkalyqtar Natanıel Lemmons – Djekson Ýıtroýmen ótkizdi.

Qazaqstandyq-ýkraınalyq jup birinshi partııada tartysty taı-breıkte ǵana ese jiberdi – 6:7 (10:12).

Esesine ekinshi sette qarymta qaıyrdy – 6:3.

Sýper taı-breıkte Lomakın men Manafov 2:7 esebimen utylyp jatyp, jeńisti julyp aldy – 10:8.

Eki saǵatqa jýyq ýaqytqa sozylǵan match barysynda qazaqstandyq-ýkraınalyq jup 6 eıspen birge 6 breık-poınttyń ekeýin óz esepterine jazdy. Olardyń shırek fınaldaǵy qarsylastary keıin anyqtalady.

Amerıkalyq jup bıylǵy jyl basynda elordada ótken ATP Forte Challenger 125 jarysynda chempıon atanǵan bolatyn.

Qazaqstannyń áıelder arasynda birinshi, álemniń 21-raketkasy Elena Rybakına Istborn (Ulybrıtanııa) WTA 500 dodasyn birden ekinshi aınalymnan bastaǵanymen, dúnıejúzilik reıtıngte 114-orynda turǵan ýkraınalyq Lesıa Tsýrenkodan utylyp qaldy – 6:1, 5:7, 3:6.

Eske sala keteıik, budan buryn ıÝlııa Pýtıntsevanyń Istborn týrnıriniń úshinshi aınalymyna shyqqanyn, Arýjan Saǵyndyqovanyń álemdegi úzdik 70 jas tennısshiniń qataryna kirgenin jazǵan bolatynbyz.



Uqsas jańalyqtar
Fýtboldan UEFA Sýperkýbogynyń ıegeri anyqtaldy
2022 jylǵy 11 tamyz 07:20

Fýtboldan UEFA Sýperkýbogynyń ıegeri anyqtaldy

NUR-SULTAN. QazAqparat - Ispanııanyń «Real Madrıd» komandasy fýtboldan UEFA Sýperkýbogynyń bıylǵy ıegeri boldy, dep habarlaıdy QazAqparat tilshisi.

Fınlıandııa astanasy Helsınkı qalasyndaǵy «Olımpııskıı» stadıonynda ótken kezdesýde ıspanııalyq klýb Germanııanyń «Aıntraht» komandasymen kýbokty sarapqa saldy.

Kezdesý barysynda «Real Madrıd» sapynan Davıd Alaba 37-mınýtta esep ashsa, 65-mınýtta Karım Benzema qorytyndy esepti belgiledi.

Osylaısha ıspanııalyq klýb qarsylasynan 2:0 esebimen basym túsip, kýbokty jeńip aldy.

UEFA Sýperkýbogynyń bastalǵanyna bıyl týra jarty ǵasyr tolyp otyr. Qazirge deıin «Real Madrıd» atalǵan týrnırde jeti márte baq synady. Onyń 4-inde jeńimpaz atansa, 3-inde qarsylasyna ese jiberdi. Al «Aıntraht» atalǵan týrnırge tuńǵysh márte qatyspaqshy.

Sýperkýbokty ıelený jóninen «Real Madrıd» Ispanııanyń «Barselona» jáne Italııanyń «Mılan» komandalarymen teńesti. Olardyń árbirinde bes-besten kýbok bar.

Jalpy, mundaı ataqqa barlyǵy 24 komanda qol jetkizdi.



Foto: sports.kz





Elena Rybakına Toronto masters týrnırinde jeńilip qaldy
2022 jylǵy 11 tamyz 00:10

Elena Rybakına Toronto masters týrnırinde jeńilip qaldy

NUR-SULTAN. QazAqparat – Qazaqstannyń birinshi, álemniń 27-raketkasy Elena Rybakına Toronto (Kanada) WTA-1000 týrnıriniń úshinshi aınalymyna shyǵa almady, dep habarlaıdy QazAqparat tilshisi.

E.Rybakına ekinshi aınalymda álemniń 11-raketkasy, 18 jastaǵy amerıkalyq Korı Gaýfpen sheberlik baıqasty.

Birinshi partııa barysynda breık jasaǵan amerıkalyq sportshy basymdylyq tanytty – 6:4.

Tartysty ótken ekinshi sette taı-breıkte Elena sátti oınaı bildi – 7:6 (10:8).

Úshinshi, sheshýshi partııada qazaqstandyq tennısshi breıkpen alǵa ketkenimen, K.Gaýff sol boıda tarazy basyn teńestirdi – 2:2. Sosyn Gaýff 4:2 esebimen alǵa shyqty. Esep 5:3 bolyp, matchqa dop bergende, Rybakına breık jasap, sosyn esepti teńestirdi – 5:5. Aqyry match taǵdyry taı-breıkte sheshildi. Bul joly Gaýff jeńisti julyp aldy – 7:6 (7:3).

Úsh saǵatqa jýyq ýaqytqa sozylǵan tartysty báseke barysynda E.Rybakına 8 eıs jasap, 5 breık-poınttyń úsheýin paıdalandy. Qarsylasy 4 eıs, 4 breıkpen kózge tústi.

Amerıkalyq tennısshi Toronto jarysynyń (júlde qory – 2 mln 697,250 myń AQSh dollary) shırek fınalyna shyǵý úshin álemniń 6-raketkasy, Belarýs ókili Arına Sobolenko nemese reıtıngte 41-orynda turǵan ıspanııalyq Sara Sorrıbes-Tormonyń bireýimen talasady.

Taǵy bir qazaqstandyq ıÝlııa Pýtıntseva ekinshi aınalymda álemniń 3-raketkasy, ıspanııalyq Paýla Badosamen kezdesedi.

Eske sala keteıik, budan buryn Mıhaıl Kýkýshkınniń Chıkago týrnıriniń ekinshi aınalymyna ótkenin jazǵan bolatynbyz.

Sondaı-aq Óskemen týrnırinde qazaqstandyq tennısshiler ózara kezdesedi.




Maǵan boks onsha unamaıdy - Danııar Eleýsinov sporttyq mansabyn aıaqtaý jaıly pikir bildirdi
2022 jylǵy 10 tamyz 23:08

Maǵan boks onsha unamaıdy - Danııar Eleýsinov sporttyq mansabyn aıaqtaý jaıly pikir bildirdi

NUR-SULTAN. QazAqparat - Qazaqstandyq kásipqoı boksshy Danııar Eleýsinov (11-0, 6 KO) jaqyn arada sporttyq mansabyn aıaqtaý máselesine qatysty pikir aıtty, dep habarlaıdy QazAqparat Sports.kz saıtyna silteme jasap.

«Maǵan boks onsha unamaıdy, men bar bolǵany jeńiske jetkendi unatamyn. Maǵan promoýter kerek, meniń jekpe-jekke shyǵýym kerek. Jyl sońyna deıin osy oılaǵanym bolmasa, onda sporttyq mansabymdy aıaqtaıtyn shyǵarmyn. Men ózimdi maǵan senetin jáne men úshin basyn báıgege tigetin promoýterge laıyqpyn dep sanaımyn», - dedi sportshy.

Danııar sońǵy ret jekpe-jeke ótken jyldyń jeltoqsanynda argentınalyq Hýan Ernan Lealmen (15-3, 4 KO) shyqqan. Ol joly tóreshiler biraýyzdan sheshim shyǵaryp, IBO nusqasy boıynsha jartylaı orta salmaqta álem chempıony ataǵyn Eleýsinovke bergen edi.

Jańalyqtar

Úrdis

MURAǴAT