Teńiz ken ornyndaǵy jarylystan zardap shekkenderge materıaldyq kómek kórsetiledi
2022 jylǵy 6 shilde 17:05

Teńiz ken ornyndaǵy jarylystan zardap shekkenderge materıaldyq kómek kórsetiledi

ATYRAÝ. QazAqparat – Teńiz ken ornyndaǵy jarylystan zardap shekkenderge materıaldyq kómek kórsetiledi. Bul týraly Atyraý oblysynyń ákimi Serik Shápkenov málim etti, dep habarlaıdy QazAqparat.

Atyraý oblysynyń ákimi Serik Shápkenov «Teńiz» ken ornynda bolǵan apatty jaǵdaıǵa baılanysty shuǵyl jıyn ótkizdi.

Oblys ákiminiń baspasóz qyzmetinen málim etkendeı, oǵan ákimdikke qarasty basqarmalardyń basshylary, «Teńizshevroıl» JShS-niń, oblystyq tótenshe jaǵdaılar jáne polıtsııa departamentteriniń ókilderi qatysqan.

Serik Shápkenov jarylystan qaza tapqan jumysshylardyń týystary men jaqyndaryna kóńil aıtty. Qaza tapqandar men zardap shekkenderdiń otbasylaryna qajetti materıaldyq kómek kórsetiletinin málim etti.

«Oblystyq densaýlyq saqtaý basqarmasynyń basshysyna jaraqat alǵan jumysshylarǵa medıtsınalyq kómek kórsetýdi tapsyrdym. Apattyń sebep-saldaryn anyqtaý maqsatynda oblystyq deńgeıde arnaıy komıssııa qurylyp, zań aıasynda tekserý jumystaryn júrgizedi», - dedi oblys ákimi Serik Shápkenov.

Búgin, 6 shildede jergilikti ýaqytpen saǵat 9:55 shamasynda Teńiz ken ornynda jarylys bolyp, eki adam qaza tapqanyn habarlaǵan bolatynbyz.

Jarylys «Senimdi Kurylys» merdiger kompanııasy men qosalqy mekemeniń qyzmetkerleri qurylys alańynda atqarǵan gıdravlıkalyq synaý kezinde bolǵan. Sonyń saldarynan eki adam mert bolyp, úsh adam jaraqat alǵan.

Oblystyq densaýlyq saqtaý basqarmasy baspasóz qyzmetiniń málimetinshe, Teńiz ken ornynda jarylystan jaraqat alǵandardyń ekeýi aýrýhanaǵa jetkizildi.

Jaraqat alǵan jumysshynyń bireýi «Teńizshevroıl» JShS-ne qarasty ushaqpen Atyraý oblystyq aýrýhanasyna jetkizildi. Qazir naýqasqa dárigerler saraptama júrgizip jatyr. Taǵy bir jaraqat alǵan jumysshy Jylyoı aýdandyq ortalyq aýrýhanasyna tústi. Ol jambasynan jabyq jaraqat alǵan. Onyń jaǵdaıy ortasha turaqty. Zardap shekken úshinshi jumysshyǵa «TShO klınıkasy» medıtsınalyq mekemesiniń qyzmetkerleri psıhologııalyq kómek kórsetip jatyr.

Foto: businesswire.com
Uqsas jańalyqtar
Seriktester jańalyqtary

Jańalyqtar

Úrdis

MURAǴAT