Teńiz ken ornyndaǵy jarylys qubyrdyń flanetsti qosylysynyń úzilýinen bolǵan
2022 jylǵy 6 shilde 20:07

Teńiz ken ornyndaǵy jarylys qubyrdyń flanetsti qosylysynyń úzilýinen bolǵan

ATYRAÝ. QazAqparat – Atyraý oblysynyń Teńiz ken ornyndaǵy jarylys qubyrdyń flanetsti qosylysynyń úzilýinen bolǵan. Bul týraly oblystyq tótenshe jaǵdaılar departamentiniń qoǵammen baılanys bóliminen málim etti, dep habarlaıdy QazAqparat tilshisi.

Búgin, 6 shildede jergilikti ýaqytpen saǵat 9:55-te Teńiz ken ornynda jarylys bolyp, eki adam qaza tapqanyn habarlaǵan bolatynbyz.

Jarylys Jylyoı aýdanynyń ortalyǵy – Qulsary qalasynan 150 shaqyrym qashyqtaǵy Teńiz ken ornynda bolǵan. Jarylystyń saldarynan úsh adam jaraqat alǵan.

«Teńiz ken ornyndaǵy 3-býyn zaýytynyń 42-ýchaskesinde gıdrotest júrgizý kezinde qubyrdyń flanetsti qosyndysy úzilgen. Atalǵan jobany iske asyratyn merdiger kompanııa – «Senimdi Qurylys» JShS-de jumys isteıtin 1985 jylǵy er adam oqıǵa ornynda qaza tapty. Keıin «Teńizshevroıl» JShS-ne qarasty medıtsınalyq klınıkada «Agroprom tehnıka» JShS-niń bir jumysshysy qaıtys boldy. Onyń jasy – 37-de», -dep habarlady tótenshe jaǵdaılar departamentiniń baspasóz qyzmeti.

Ken ornyndaǵy jarylystan úsh adam zardap shekken. Olar – Onstream Kazakhstan, «Senimdi Qurylys» jáne «Muqan servıs» JShS-niń jumysshylary. Zardap shekkender – 29 jáne 26-jastaǵy er adamdar.

«Jaraqat alǵan jumysshynyń biri – Onstream Kazakhstan JShS-niń 26 jastaǵy er adam «Teńizshevroıl» JShS-niń áýe kemesimen Atyraý oblystyq aýrýhanasyna jetkizildi. Qazir naýqastyń jaǵdaıy aýyr dep baǵalanyp otyr. Naýqas oblystyq aýrýhananyń hırýrgııa bólimshesine jatqyzyldy», -dep málim etti departamenttiń baspasóz qyzmetinen.

Eske sala ketelik, buǵan deıin Teńiz ken ornynda jarylystan jaraqat alǵandardyń ekeýi aýrýhanaǵa jetkizilgenin, keıin jarylystan zardap shekkenderge materıaldyq kómek kórsetiletinin jazǵan edik.

Foto: businesswire.com
Uqsas jańalyqtar
Seriktester jańalyqtary

Jańalyqtar

Úrdis

MURAǴAT