Teatr jáne kıno akteri Saǵat Jylgeldıev dúnıeden ozdy
2022 jylǵy 16 mamyr 09:40

Teatr jáne kıno akteri Saǵat Jylgeldıev dúnıeden ozdy

ALMATY. QazAqparat - Belgili akter Saǵat Jylgeldıev ómirden ozdy, dep habarlaıdy QazAqparat tilshisi Ǵ.Músirepov atyndaǵy akademııalyq balalar men jasóspirimder teatrynyń baspasóz qyzmetine silteme jasap.

«Teatrymyzdyń akteri, jany jaısań Saǵat Jylgeldıev aǵamyz dúnıeden ótti. Teatr ujymy, áriptesteri marqumnyń jubaıy Jibek Lebaeva men otbasy, týǵan-týystarynyń qaıǵysyna ortaqtasyp, kóńil aıtady. Baqul bolyńyz aǵa! Sizdiń jarqyn beıneńizdi áriptesterińiz, ujym, ózińizdiń súıikti kórermenderińiz máńgi jadynda saqtaıdy», - delingen habarlamada.

Saǵat Ermaǵambetuly Jylgeldıev - 1954 jyldyń 12 jeltoqsanynda Qyzylorda oblysy, Jalaǵash aýdany, Aqqyr aýylynda týǵan.

Qazaqstannyń eńbek sińirgen ártisi, Eren eńbegi úshin medaliniń ıegeri.

Saǵat Ermaǵambetuly Qazaq drama teatry janyndaǵy teatr stýdııasyn, Qazaq ulttyq konservatorııasynyń akterlik bólimin bitirgen.

Ol eńbek jolyn 1977 jyly Taldyqorǵan qalasyndaǵy oblystyq Bıken Rımova atyndaǵy drama teatrynda bastady.

1997 jyldan beri Ǵabıt Músirepov atyndaǵy Qazaq Memlekettik Akademııalyq balalar men jasóspirimder teatrynyń akteri boldy.

Sýret: alashainasy.kz

Avtor:
Tilshi

Jańalyqtar

MURAǴAT