Tájik-Qyrǵyz janjaly memleketaralyq qarym-qatynasqa esh áser etpeıdi – Bolat Nurǵalıev
2022 jylǵy 28 qańtar 18:12

Tájik-Qyrǵyz janjaly memleketaralyq qarym-qatynasqa esh áser etpeıdi – Bolat Nurǵalıev

NUR-SULTAN. QazAqparat – Qyrǵyzstan men Tájikstan arasyndaǵy shekaralyq janjal qanshalyqty qaýipti jáne bolǵan jaıtqa qatysty Qazaqstannyń ustanymy qandaı? Atalǵan suraqtarǵa qatysty QR Syrtqy ister mınıstrligi janyndaǵy syrtqy saıası zertteýler ınstıtýtynyń basqarma tóraǵasy Bolat Nurǵalıev pikir bildirdi, dep habarlaıdy QazAqparat tilshisi.

«Meniń pikirim, bul turmystyq janjal. Odan shý shyǵarýdyń qajeti joq. Bul soǵys emes. Ózara kelispeýshilik birneshe saǵatqa ǵana sozyldy. Onyń ústine ekijaq oq atyspaý jóninde kelisimge keldi. Bul ishki másele, sondyqtan syrttan aralasýdyń qajeti joq. Atalǵan janjal memleketaralyq qarym-qatynasqa esh áser etpeıdi. Bizde de bolady ǵoı, kórshi eki aýyl ózara kelispeı qalady, sol sekildi. Árıne, tájik-qyrǵyz shekarasynda ne bolyp jatqanyn bilmeımin, óz kózimmen kórgen joqpyn», - dedi Bolat Nurǵalıev.

Onyń aıtýynsha, atalǵan másele eki arasynda ózara sheshilýi tıis. ıAǵnı syrt kúshtiń aralaspaǵany jón.

«Kez kelgen janjaldy sheshýdiń eki joly bar. Birinshi, beıbit jolmen sheshý, ıaǵnı ymyraǵa kelý. Ekinshi joly, ókinishke qaraı, qanǵa qan. Degenmen kórip otyrǵanymyzdaı, tájik-qyrǵyz aǵaıyn ózara kelisimge kelip, oq atýdy toqtatty. Taǵy bir eskeretin jaıt, janjal kútpegen jerden bolýy múmkin. Sondyqtan onyń qashan, kimniń arasynda bolatynyn eshkim aldyn ala aıta almaıdy. Bastysy sabyrǵa, kelisimge kelý kerek. Árıne, bizdiń el tájik-qyrǵyz janjalynyń beıbit jolmen sheshilýin qoldaıdy jáne eki elge birdeı tatýlyq tileımiz», - deıdi ol.

Sondaı-aq ınstıtýt basshysy elde bolǵan jappaı tártipsizdikter kezinde atalǵan eki elde Qazaqstanǵa qoldaý bildirgenin aıtty.


Jańalyqtar

MURAǴAT