Tasqyn sý aǵyny áli kelip jatyr – Túrkistan oblystyq TJD
TÚRKІSTAN. QazAqparat – Túrkistan oblysynda tasqyn sý aǵyny áli kelip jatyr. Bul týraly Óńirlik kommýnıkatsııalar qyzmetinde ótken brıfıngide oblystyq Tótenshe jaǵdaılar departamenti bastyǵynyń orynbasary Baqytjan Zaparov aıtty, dep habarlaıdy QazAqparat.
Málim etilgendeı, jańbyr túrinde jaýyn-shashynnyń mol túsýine jáne qardyń jyldam erýine baılanysty 3 aýdandaǵy taýly jerlerde, atap aıtqanda Báıdibek (Shaıan, Tańatar, Yntymaq, Aqbulaq, Shaqpaq, Birlik), Saýran (Babaıqorǵan, Abaı, Úlgili, Orańǵaı, Maıdantal, Shaǵa), Ordabasy aýdandarynda (Shubarsý, Badam, Shubar) sý taý betkeıinen tómen aqqan.
«Úılerdi sý basýdan saqtap qalý úshin Tótenshe jaǵdaılar departamentiniń jáne jergilikti atqarýshy organ qyzmetkerleri qum salynǵan 2500 birlik kóleminde qapshyqtardy tósep jatyr. Kanaldardy qazý arqyly sýdy burý jáne aǵyzý jumystarynyń nátıjesinde Maıdantal aýylynda úı aýlalaryn sý basý qaýpi seıildi.
Qazirgi ýaqytta qaza bolǵandar men zardap shekkender joq.
Jaýyn-shashyn oblys aýmaǵynda toqtady. Alaıda sý aǵyny áli de kelip jatyr.
Sýdy sorý jáne aǵyzý jumystaryna barlyǵy 308 adam, 51 tehnıka, 25 motopompa, 1 júzý quraly jumyldyryldy. Onyń ishinde TJD-niń: 68 adamy, 11 tehnıkasy, 20 motopompa, 1 júzý quraly. Jergilikti atqarýshy organnyń 240 adamy, 40 tehnıkasy, 5 motopompa», - dep málim etti Baqytjan Zaparov.
Eske salaıyq, búgin tańerteń Túrkistan oblysynda birneshe eldi mekendi sý basyp qaldy. Óńirde jedel jeli iske qosyldy. Saýran aýdanynda mektep oqýshylary onlaın oqýǵa kóshti. Sondaı-aq osy aýdanda 7 balabaqsha jumysyn toqtatty.
Qyzylorda men Túrkistan oblystarynda aýa raıynyń qolaısyzdyǵynan avtomobıl joldarynyń birqatar bóliginde kólik qozǵalysyna shekteý qoıyldy.
Foto: instagram.com/turkistan_tjd
