Tártipsizdik kezinde qamaýǵa alynǵan 31 adam aýrýhanada emdelip jatyr - ІІM
2022 jylǵy 22 qańtar 18:34

Tártipsizdik kezinde qamaýǵa alynǵan 31 adam aýrýhanada emdelip jatyr - ІІM

NUR-SULTAN. QazAqparat – Qazaqstanda bolǵan jappaı tártipsizdik kezinde qamaýǵa alynǵan 31 adam búginde aýrýhanada em alyp jatyr. Bul týraly QR ІІM Qylmystyq-atqarý júıesi komıteti tóraǵasynyń orynbasary Meıram Aıýbaev málim etti, dep habarlaıdy QazAqparat tilshisi.

«Qańtardyń basynda bolǵan jappaı tártipsizdik barysynda polıtsııa jáne áskerı qyzmetshiler elde tártipti ornatý úshin aýqymdy operatsııa júrgizdi. Quqyq qorǵaý organdary tergeýdi áli aıaqtaǵan joq. Qabyldanǵan sharalardyń nátıjesinde sot sheshimimen kúdikti adamdar qamaýǵa alyndy. Atalǵan adamdar tergeý ızolıatoryna qabyldanǵan kezde mindetti túrde medıtsınalyq tekserýden ótip, PTR testiniń teris nátıjesimen qabyldanady», - dedi Meıram Aıýbaev OKQ-de onlaın ótken baspasóz máslıhatynda.

Komıtet tóraǵasy orynbasarynyń aıtýynsha, dene jaraqaty nemese qandaı da bir aýrý anyqtalǵan kezde olarǵa mindetti túrde medıtsınalyq kómek kórsetiledi.

Jáne ol týraly prokýratýraǵa habarlanady.

«Mekeme tıisti medıtsınalyq kómek kórsete almaǵan jaǵdaıda olar azamattyq aýrýhanalarǵa jetkiziledi jáne arnaıy kúzetpen emdeledi. Búgingi tańda osyndaı 31 adam bar, onyń 29-y Almaty qalasynyń aýrýhanalarynda, bir-bireýden Qyzylorda jáne Atyraý qalalyq aýrýhanasynda jatyr. Olar dene jaraqatyn tergeý ızolıatoryna kelgenge deıin aldy. Biz olardy qamaýǵa alǵanda anyqtap tirkedik jáne prokýratýraǵa habarladyq», - deıdi ol.


Jańalyqtar

MURAǴAT