Tarazdyń irgesindegi fosfogıps úıindisiniń aınalaǵa zııany bar-joǵy tekseriledi
2022 jylǵy 27 maýsym 10:10

Tarazdyń irgesindegi fosfogıps úıindisiniń aınalaǵa zııany bar-joǵy tekseriledi

NUR-SULTAN. QazAqparat – Taraz qalasynyń irgesinde taý-taý bolyp úıilip jatqan fosfogıps úıindisiniń qorshaǵan ortaǵa zııany tekseriledi. Bul týraly QR Premer-Mınıstriniń birinshi orynbasary Roman Sklıar Májilis ókilderiniń depýtattyq saýalyna joldaǵan jaýabynda aıtty, dep habarlaıdy QazAqparat tilshisi.

Atalǵan depýtattyq saýalda «Qazfrosfat» JShS-ne tıesili óndiris qaldyǵyn aýyl sharýashylyǵynda topyraqty tyńaıtqysh mıneral retinde paıdalaný máselesi kóterilgen bolatyn. Ol úshin ónimdi alqaptarǵa tasymaldaý jáne satyp alý shyǵynyn bıýdjet esebinen sýbsıdııalaý usynylǵan edi.

«Fosfogıps fosfor tyńaıtqyshtaryn óndirý kezinde ilespe ónim bolyp tabylatynyn jáne tyńaıtqysh bolyp tabylmaıtynyn eskere otyryp, fosfogıpsti satyp alýdy sýbsıdııalaý tıimsiz dep sanaımyn», - dep jazylǵan vıtse-Premerdiń jaýabynda.

Sondaı-aq, ekologııaǵa jaýapty mınıstrlik atalǵan kásiporynnyń óndiris qaldyǵyn saqtaý sharalaryna tekserý júrgiziletinin málimdegen.

«2022 jyldyń birinshi jartyjyldyǵy sońyna deıin «Qazfosfat» JShS-ne Qazaqstan Respýblıkasy Ekologııa, geologııa jáne tabıǵı resýrstar mınıstriniń 2021 jylǵy 10 jeltoqsandaǵy № 493-p buıryǵymen bekitilgen Qorshaǵan ortany qorǵaý salasyndaǵy baqylaý sýbektisine 2 (obektisine) barý arqyly profılaktıkalyq baqylaý tizimi negizinde profılaktıkalyq baqylaý júrgiziledi. Profılaktıkalyq baqylaýdyń nátıjeleri boıynsha «Qazfosfat» JShS tarapynan buzýshylyqtar anyqtalǵan jaǵdaıda, qoldanystaǵy zańnama sheńberinde sharalar qabyldanatyn bolady. Tutastaı alǵanda tabıǵı resýrstardy utymdy paıdalaný, qorshaǵan ortany qorǵaý jáne ekologııalyq qaýipsizdikti qamtamasyz etý máseleleri Úkimettiń baqylaýynda», - dep jazady Roman Sklıar.

Eske salsaq, sáýir aıynda sharýalar men Jambyl oblysy ákimdiginen ammofos baǵasyn kóterý týraly shaǵym túsýine baılanysty Básekelestikti qorǵaý jáne damytý agenttigi «Qazfosfat» JShS-ne qatysty monopolııaǵa qarsy tergep-tekserýdi bastaǵan bolatyn.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT