Tarazda balanyń kózinshe ıt atty degen qyzmetkerdiń basy daýǵa qaldy

TARAZ. QazAqparat – Tarazda balanyń kózinshe ıt atqan qańǵybas janýarlardy aýlaǵysh brıgada qyzmetkerleriniń basy daýǵa qaldy, dep habarlaıdy QazAqparat tilshisi.

Oqıǵa qaladaǵy úılerdiń birindegi beınebaqylaý kamerasyna túsip qalǵan. Beınetúsirilimnen qolyna qarý ustaǵan er adamnyń ıt pen kishkentaı qyzdy aınalshyqtap, keıin janýardy súırep alyp bara jatqanyn anyq kórýge bolady. Onyń bul áreketi jelide qyzý talqylandy.

Qalalyq veterınarııa bóliminiń málimetinshe, mamandar onda turǵyndardyń shaqyrtýymen arnaıy barǵan. Al ıtti basqa jerde atqan kórinedi. Aıtýlarynsha, qalada adamdardy ıt tisteý deregi kóbeıgen. Jyl basynan beri 1200 oqıǵa tirkelip, 9 myńnan astam qańǵybas ıt atylypty.

«Kóshede júretin janýardy aýlaǵyshty shaqyryp, túsinikteme aldyq. Qala boıynsha qazirgi tańda úsh brıgada jumys isteýde. Taraz qalasy boıynsha mundaı jaǵdaılar taǵy da qaıtalanbas úshin árqaısysymen túsinikteme jumystary júrgiziledi. Jurt talqysyna túsken oqıǵadaǵy qyzmetker quzyrly organdarmen kináli dep tanylsa, jumystan qýylady»,-deıdi qalalyq veterınarııa bóliminiń basshysy Ánýarbek Qaltaev.