Taraz soty mektep dárethanasynda oqýshyny zorlaǵan qylmyskerge úkim shyǵardy

TARAZ. QazAqparat –Jambyl oblystyq qylmystyq ister jónindegi mamandandyrylǵan aýdanaralyq sotynda mektep dárethanasynda oqýshy qyzdy zorlaý qylmysyna qatysty 10 kúndik sot otyrysy aıaqtaldy, dep habarlaıdy QazAqparat sottyń baspasóz qyzmetine siltememen.

Uqsas jańalyqtar

Dáýren Abaev Tarazdaǵy oqýshyny zorlaý oqıǵasy týraly pikir bildirdi

Balalar este saqtap úlgermeıdi: Depýtattar jıi aýysatyn mektep ınspektorlary jóninde

Eske sala ketsek, byltyr 15 qarasha kúni Taraz qalasynyń «102» pýltine jedel járdem qyzmetinen jasóspirim qyzdyń zorlanǵany týraly habar túsedi. Sotqa deıingi tergeý QR QK 120-babynyń 4-bóligi jáne 121-babynyń 4-bóligi boıynsha júrgizildi. Kóp uzamaı aýyr qylmys jasady degen kúdikpen er adam ustaldy.

Qylmys mekteptiń dalada ornalasqan dárethanasynda jasalǵan. Kúdiktini ustaýǵa mektep aýmaǵyndaǵy kameralar kómektesken.

Sot zardap shegýshiniń jas ereksheligin eskere otyryp jabyq rejimde ótti. Sot barysynda aıyptalýshy óz kinásin tolyq moıyndady.

Sottalýshy – 38 jastaǵy Taraz turǵyny, úılenbegen, buǵan deıin osy tektes qylmys jasaǵany úshin sotty bolǵan. Ol QR Qylmystyq kodeksiniń 121-baby, 4-bóligi «Kámeletke tolmaǵanǵa qatysty seksýaldy sıpattaǵy zorlyq-zombylyq» jáne 120-baby, 4-bóligi «Kámeletke tolmaǵanǵa qatysty zorlaý» boıynsha kináli dep tanyldy. Sot jazalardy biriktire otyryp, 25 jylǵa bas bostandyǵynan aıyrý jáne hımııalyq kastratsııa jasaý týraly úkim shyǵardy.

Sonymen qatar, sottalýshy jábirlenýshi tarapqa 5 mıllıon teńge kóleminde moraldyq shyǵyndy tóleýge mindetteldi.

Oblys ákimi Asqar Myrzahmetovtiń tapsyrmasymen Jambyl oblysynyń polıtsııa basqarmasy mektepterdegi oqýshylardyń qaýipsizdigin qamtamasyz etýdegi kemshilikterdi anyqtaý úshin jumys tobyn qurdy. Quqyq qorǵaý jáne bilim berý bólimderiniń birqatar qyzmetkerleri jazaǵa tartyldy.