Tanymal qazaqstandyq jazýshy Kemel Toqaevtyń kitaby ázerbaıjan tilinde jaryq kórdi
2022 jylǵy 18 tamyz 00:31

Tanymal qazaqstandyq jazýshy Kemel Toqaevtyń kitaby ázerbaıjan tilinde jaryq kórdi

NUR-SULTAN. QazAqparat – Qazaq detektıviniń negizin qalaýshy, áıgili jazýshy Kemel Toqaevtyń «Nochnoı vystrel» atty jınaǵy ázerbaıjandyq «Ganýn» baspasynan, ásem etip bezendirilgen muqabamen jaryq kórdi, dep habarlaıdy QazAqparat AZERTADJ agenttigine silteme jasap.

Agenttiktiń habarlaýynsha, kitapty ázerbaıjan tiline jazýshy-aýdarmashy Narıman Abdýlrahmanly aýdarǵan. Kitaptyń retsenzenti fılologııa ǵylymdarynyń doktory, professor Badırhan Ahmedlı, redaktory Mahır Garaev.

Kitaptyń alǵysózin detektıv janrynda jazylǵan shyǵarmalardyń tanymal avtory, Ázerbaıjan Jazýshylar Odaǵynyń birinshi hatshysy, Kemel Toqaevtyń shyǵarmalarymen etene tanys halyq jazýshysy Chıngız Abdýllaev jazdy.

Onyń «Qasıetti paryz» atty bóliminde Kemel Toqaevtyń shyǵarmashylyǵyna aýqymdy ári dál baǵa berilgen jáne sheber jazýshynyń rýhanı qundylyqtarǵa erekshe mán beretini aıtylǵan.

Kitaptyń taǵy bir ereksheligi – «Áke týraly birer sóz» atty basylymnyń alǵysózi. Ony Kemel Toqaevtyń balasy Qazaqstan Respýblıkasynyń Prezıdenti Qasym-Jomart Toqaevtyń ózi jazǵan.

Óziniń memýarlyq essesinde Qasym-Jomart Toqaev jazýshynyń ómir joly týraly baıandaıdy, onyń týyp-ósken ortasyn sýretteıdi, maıdandaǵy qıyndyqtary týraly áńgimeleıdi. Sondaı-aq Kemel Toqaevtyń jazýshy retinde qalyptasýy jóninde syr shertip, onyń shyǵarmalaryna degen óziniń kózqarasy, shyǵarmashylyq ustanymy men joldastary týraly júrekjardy pikirin bildiredi.

Jınaqqa «Zoloto s tamgoı», «Nochnoı vystrel» jáne «Taınstvennyı sled» povesteri engen. Avtor bul týyndylarynda alypsatarlarmen kúres, arnaıy qyzmetterdiń sheteldik jansyzdarmen qaqtyǵysy, jaýdyń barlaýshylarynyń qylmystaryn ashýdaǵy óte joǵary kásibı deńgeıi, soǵys jyldaryndaǵy qıyn-qystaý kúnderdi óte sheber baıandaıdy.

Bul kitaptyń Qazaqstan men Ázerbaıjan halqy arasyndaǵy mádenı jáne ádebı baılanystyń nyǵaıýyna zor úles qosyp, oqyrmandardyń kitapty erekshe qyzyǵýshylyqpen oqıtyny sózsiz.


Seriktester jańalyqtary

Jańalyqtar

Úrdis

MURAǴAT