Tanymal akter Farhat Ábdiraıymov qaıtys boldy
2021 jylǵy 21 mamyr 10:18

Tanymal akter Farhat Ábdiraıymov qaıtys boldy

NUR-SULTAN. QazAqparat – Grýzııada túsirilim barysynda Qazaqstan akteri Farhat Ábdiraıymov qaıtys boldy. Bul aqparatty QR Mádenıet jáne aqparat mınıstrligi rastady, dep habarlaıdy QazAqparat tilshisi.

«Ókinishke oraı ras aqparat. Ol Grýzııada túsirilimde bolǵan edi. Ólim sebebi – ınfarkt», - dep habarlady keıinnen «Qazaqfılm» AQ-dan.

Farhat Ábdiraıymov 1966 jyly 21 qańtarda Almaty qalasynda týǵan. Almaty tehnologııalyq ýnıversıtetin ınjener-tehnolog mamandyǵy boıynsha bitirgen. 1999 jyldan Sh.Aımanov atyndaǵy «Qazaqfılm» AQ-nyń akteri bolǵan edi.

Ol «Shanhaı», «Aqsýat», «Ompa», «Mahabbat tálkegi», «Sıqyrshy demeýshi», «Jel adam», «Frantsýz qurbaqasynan ázirlengen bor», «Shekara», «Jan júregim - Astana», «Parallel álem», «Geızer», «Úsh lımon», «Batyr», «Eń sulý» syndy fılmderge túsken.

Farhat Nursultanuly RF «Úzdik akter» kıno basylymynyń bas júldesin, XXI Halyqaralyq «Svıatoı Georgıı Pobedonosets» kınofestıvaliniń Gran-prı júldesin jeńip alǵan. 2020 jyly «Altyn Adam» syılyǵynyń «Jyl kınojuldyzy» atalymyn ıelengen.

QR Prezıdentiniń Qurmet gramotasymen marapattalǵan.


Jańalyqtar

MURAǴAT