Tamyzda medıtsınalyq maska shyǵaratyn túrkııalyq zaýyttyń qurylysy aıaqtalady – QR IIDM
2022 jylǵy 23 maýsym 21:46

Tamyzda medıtsınalyq maska shyǵaratyn túrkııalyq zaýyttyń qurylysy aıaqtalady – QR IIDM

NUR-SULTAN. QazAqparat - QR Indýstrııa jáne ınfraqurylymdyq damý mınıstri Qaıyrbek Óskenbaev «MFA International» JShS men «ATM Construction & Investment» JShS zaýyttarynyń qurylysymen tanysty, dep habarlaıdy QazAqparat mınıstrliktiń baspasóz qyzmetine silteme jasap.

Vedomstvo basshysy birinshi aıaldaǵan «MFA International» JShS zaýyty medıtsınalyq betperdeler men aýa tazartatyn respıratorlar óndiredi. «Astana – jańa qala» AEA ındýstrııalyq parki aýmaǵynda ornalasqan túrkııalyq kásiporynnyń qurylysy bıyl tamyz aıynda tolyǵymen aıaqtalmaq.

Jobanyń alǵashqy kezeńinde Z-267 serııaly qorǵanysh deńgeıi joǵary betperde shyǵarý kózdelse (jylyna 2,5 mln dana betperde), kásiporyn tolyq iske qosylǵanda Prestij (P-267V) serııaly medıtsınalyq maska óndirý josparlanǵan (jylyna 10 mln dana betperde). Jobanyń jalpy quny – 2,1 mlrd teńge.

Al tereze, medıtsınalyq qural-jabdyqtar, keńse jıhazdary men metall buıymdaryn óndiretin «ATM Construction & Investment» JShS zaýyty 2022 jyldyń qyrkúıek aıynda iske qosylmaq. Kásiporyn «Astana – jańa qala» arnaıy ekonomıkalyq aımaǵynda ornalasqan. Jalpy quny 22 mlrd teńgeni quraıtyn zaýyt tolyq iske qosylǵanda 500 jańa jumys orny paıda bolady dep kútilýde. Joba jalpy aýmaǵy 17 myń sharshy metr aýmaqtaǵy bes negizgi óndiristik keshennen turady.

«QR IIDM basshysy ınvestorlarmen jáne qurylysqa jaýapty tulǵalarmen kezdesip, kásiporyndardyń halyq ıgiligine qyzmet etetinine senim bildirdi», delingen QR Indýstrııa jáne ınfraqurylymdyq damý mınıstrliginiń baspasóz qyzmeti taratqan aqparatta.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT