Taldy arheologııa parkinen sırek kezdesetin taǵy úsh qorym tabyldy
2022 jylǵy 18 maýsym 23:24

Taldy arheologııa parkinen sırek kezdesetin taǵy úsh qorym tabyldy

QARAǴANDY. QazAqparat – Arheologtar Qaraǵandy oblysy Shet aýdanynyń Taldy arheologııa parkindegi Qarajartas qorymynan taǵy úsh sırek kezdesetin jerleý ornyn tapty. Tabylǵan jádigerler arasynda turmystyq zattar, zergerlik buıymdar da bar. Olar qola dáýirine jatady, dep habarlaıdy QazAqparat tilshisi.

«Munda qola jáne temir ǵasyrlarynyń kóptegen jerleý oryndary bar. Sondyqtan da tarıhty zerdeleý úshin bul tamasha oryn», – deıdi eskertkishterdi qorǵaý ortalyǵy dırektorynyń orynbasary Janbolat Májıtov.

Qazir jáne buryn tabylǵan jerleý oryndarynyń kópshiligi tonalǵan. Ǵalymdardyń pikirinshe, muny burynǵy zaman adamdary jasaǵan.

«Qorymdar tonalǵan. Máıitter kóshirilip, qundy zattar alynyp, tek qola zattar qalǵan. Biz tapqan balalardyń jerleý oryndary eresekterden bólek jáne jalpaq tastardan turǵyzylǵan. Sol kezde qaıtys bolǵan adamnyń arýaǵy mundaı tastardan attap óte almaıdy jáne adamdardy mazalamaıdy dep sengen. Sondaı-aq, bala máıitteriniń janynda sút tárizdi suıyqtyqtyń qaldyqtary bar ydys-aıaq boldy. Tabylǵan zattar sırek kezdesedi», – deıdi arheolog, tarıh ǵylymdarynyń kandıdaty Igor Kýkýshkın.

Onyń aıtýynsha, qazba jumystary jazdyń sońyna deıin jalǵasady jáne kelesi jyly tabylǵan zattar qalpyna keltiriledi.

Jumysta ǵalymdarǵa E. A. Bóketov atyndaǵy QarÝ tarıh fakýltetiniń stýdentteri kómektesedi.

«Biz munda tájirıbeden ótip jatyrmyz. Men kóptegen aqparat alyp, artefaktilerdi óz kózimmen kórgenime qýanyshtymyn. Qola dáýirindegi qysh ydystar, qola pyshaqtar, syrǵalar men saqınalar tabylǵan. Biz ejelgi adamdardyń súıekterine nazar aýdardyq jáne qazirgi zamanmen aıtarlyqtaı aıyrmashylyqty baıqadyq. Qoldar men aıaqtardyń súıekteri uzyn jáne qalyń.

Sol zamanǵy adamdardyń tisteri tań qaldyrdy. Olar tolyǵymen sútti jáne esh qanqurtsyz taza boldy. Biraq ol kezde tis pastalary da, etkalar da bolǵan joq. Bul rette adamdar gıgıenany qalaı saqtaǵan degen suraq týyndaıdy. Bir sózben aıtqanda, bizdiń qazirgi jumysymyz bizge óte unaıdy», – dep bólisti QarÝ tarıh fakýltetiniń stýdenti Bekarys Tilegenov.

Bolashaqta Taldy arheologııalyq parkinde týrıster úshin iri tarıhı-mádenı ortalyq ashylady. Tas pıramıdalardy, qorǵandardy jáne basqa da úlken jáne kishi qorymdardy qazaqstandyqtar ǵana emes, búkil álem tarıhynyń áýesqoılary da kóre alady.


Seriktester jańalyqtary

Jańalyqtar

Úrdis

MURAǴAT