Suıytylǵan gazdyń qazirgi baǵasy jyl sońyna deıin saqtalady
2022 jylǵy 29 maýsym 15:38

Suıytylǵan gazdyń qazirgi baǵasy jyl sońyna deıin saqtalady

NUR-SULTAN. QazAqparat – Suıytylǵan gazdyń búgingi naryqtaǵy baǵasyn jyl sońyna deıin saqtap qalý josparlanyp otyr. Bul týraly qaýlyny Básekelestikti qorǵaý jáne damytý agenttigi «Ashyq NQA» saıtynda talqyǵa shyǵardy, dep habarlaıdy QazAqparat tilshisi.

«Buǵan deıin shekteý qoıǵan buıryqtyń merzimi 2022 jyly shildede aıaqtalady. Suıytylǵan munaı gaz naryǵynyń bólshek segmentinde erkin baǵa belgileý engizilse, baǵanyń kúrt ósýi men qoǵamda áleýmettik shıelenistiń paıda bolý qaýpi bar. Osyǵan baılanysty, Básekelestikti qorǵaý jáne damytý agenttigi jyl sońyna deıin suıytylǵan munaı gaz baǵasyn qazirgi mólsherde qaldyrýdy usyndy», - delingen qaýlyda .

Agenttik málimetinshe, qazirgi ýaqytta zań Memleket basshysyna qol qoıýǵa jiberilgen.

Nur-Sultan, Almaty qalalary men Aqmola, Qostanaı, Qaraǵandy, Pavlodar, Soltústik Qazaqstan, Jetisý, Ulytaý jáne Almaty oblystarynda qazir kólik gazynyń baǵasy lıtrine – 70-75 teńge kóleminde.

Al, Shymkent qalasy men Shyǵys Qazaqstan, Jambyl, Batys Qazaqstan, Qyzylorda, Túrkistan jáne Abaı oblystarynda – 60-65 teńge mólsherinde.

Eń tómengi baǵa Aqtóbe, Atyraý jáne Mańǵystaý oblystarynda. Onda lıtri – 50-55 teńge turady.

Eske sala keteıik, jyl basynda Úkimet sheshimimen elimizde gaz baǵasyna 180 kúndik moratorıı jarııalanǵan bolatyn. Oǵan saı, suıytylǵan otynnyń eń joǵary quny lıtrine 70-75 teńge bolyp bekitildi.


Uqsas jańalyqtar

Jańalyqtar

Úrdis

MURAǴAT