Suıytylǵan gaz baǵasynyń kúrt ósýin shekteıtin sharalar qabyldanady
2022 jylǵy 18 qańtar 11:15

Suıytylǵan gaz baǵasynyń kúrt ósýin shekteıtin sharalar qabyldanady

NUR-SULTAN. QazAqparat – Suıytylǵan gaz baǵasynyń kúrt ósýin shekteıtin is-sharalar qabyldanady. Bul týraly búgin Úkimet otyrysynda QR Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«Suıytylǵan gaz naryǵyndaǵy jaǵdaıdy tolyq baqylaýdy qamtamasyz etý maqsatynda jedel is-sharalar qabyldandy. Atap aıtqanda, Energetıka mınıstrligi 2 buıryq bekitti. Birinshisi - 2023 jylǵy 1 qańtarǵa deıin saýda-sattyq qaǵıdalaryn toqtata turý jónindegi buıryq. Oǵan sáıkes Energetıka mınıstrligi suıytylǵan gazdy elektrondyq saýda-sattyqtan tys ótkizetin bolady. Ekinshisi - suıytylǵan munaı gazynyń shekti kóterme saýda baǵasyn tómendetý jónindegi buıryq. Oǵan sáıkes gazdyń bir tonnasy 28 myń teńgege deıin belgilenedi», - dedi mınıstr.

Sonymen qatar ol búgingi kúni elektrondyq saýda alańdarynan tys ishki naryqqa suıytylǵan gazdy jetkizý josparyn qalyptastyrý qaǵıdalaryna túzetýler engizý boıynsha buıryq ázirlengenin aıtty.

Bul túzetýler respýblıka aýmaǵynda kóterme jáne bólshek saýdada ótkizý quqyǵy bar sýbektilerdiń tizbesin keńeıtý arqyly eldiń ishki naryǵyn suıytylǵan gazben qamtamasyz etýge baǵyttalǵan.

«Qysqa merzimdi is-sharalar retinde osy jylǵy qańtar aıynyń sońyna deıin Úkimetke suıytylǵan munaı gazy baǵasynyń kúrt ósýin shekteıtin ashyqtyq qaǵıdattary men tetikterdi engizýdi eskere otyryp, elektrondyq saýda alańy/taýar bırjalary arqyly suıytylǵan gaz saýda-sattyǵyn odan ári jetildirý jóninde keshendi is-sharalar engiziletin bolady. Úkimetpen kelisilgennen keıin bul is-sharalar normatıvtik quqyqtyq aktilerge túzetýler engizý túrinde resimdeledi», - dedi Bolat Aqsholaqov.


Jańalyqtar

MURAǴAT