Suıytylǵan gaz baǵasy nelikten qymbattady
2022 jylǵy 2 qańtar 18:50

Suıytylǵan gaz baǵasy nelikten qymbattady

AQTAÝ. QazAqparat – Mańǵystaý oblysynyń ákimdigi suıytylǵan gaz baǵasynyń qymbattaýy týraly pikir bildirdi jáne jıi qoıylatyn suraqtarǵa jaýap berdi, dep habarlaıdy QazAqparat.

- Suıytylǵan gaz baǵasynyń qymbattaýyna ne sebep boldy ?

- 2022 jylǵy 1 qańtardan bastap suıytylǵan gaz óndirýshiler munaı ónimderin 100% elektrondy saýda arqyly satýǵa kóshti. Bul rette respýblıka boıynsha gazdyń ortasha baǵasy lıtrine 110 teńgeni, kórshiles Atyraý oblysynda - 115 teńgeni nemese Oralda - 120 teńgeni quraıdy.

Qazirgi ýaqytta oblys boıynsha aqyrǵy tutynýshyǵa deıingi gaz baǵasy 95-ten 115 teńgege deıin aýytqyp tur.

- Buryn gaz baǵasy 60 teńge bolatyn. Bul baǵa qaıta oralýy múmkin be, ákimdik gaz baǵasyn retteýmen aınalysa ma?

- 60 teńge mólsherindegi burynǵy baǵa endi bolmaıdy, óıtkeni qazir bırjadaǵy gazdyń baǵasy tasymaldaý jáne kásipkerdiń operatsııalyq shyǵystaryn esepke almaǵanda lıtrine 70-85 teńgeni kórsetip tur. Tutastaı alǵanda, gazdyń baǵasyn naryqtyń ózi suranys pen usynysqa qaraı qalyptastyratyn bolady.

Ákimdik gaz baǵasyn retteýge qatyspaıdy, óıtkeni bul taýar básekelestik ortaǵa tıesili.

Degenmen, jeke kásipkerler tarapynan baǵany negizsiz kóterý faktileri týyndaǵan jaǵdaıda QR Básekelestikti qorǵaý agenttiginiń departamenti ákimshilik sharalar qabyldaıdy.

- Jańaózende suıytylǵan gaz óndiretin zaýyt bar. Nelikten zaýyt ónimderi óńirge jetpeı otyr ?

- Oblysta 1973 jyldan beri gaz óndiretin jalǵyz kásiporyn – Qazaq gaz óńdeý zaýyty. Ol aıyna 14,5 myń tonna suıytylǵan gaz óndiredi. Alaıda, oblystyń tutyný kólemi 18 myń tonnaǵa jetkendikten, zaýyt óńir qajettiligin tolyq óteı almaıdy. Sondyqtan basqa óńirlerden qosymsha 3,5 myń tonna gaz jetkiziledi.

Búgingi tańda Qazaq gaz óńdeý zaýytynyń negizgi jabdyqtary 90%-ǵa tozǵan. Eger shuǵyl sharalar qoldanylmasa, aldaǵy ýaqytta zaýyt toqtap, suıytylǵan gaz tapshylyǵy bolýy múmkin. Suıytylǵan gazdy óz naryqtyq baǵasyna ótkizýdiń arqasynda jańa zaýyt salý josparlanýda.


Jańalyqtar

MURAǴAT