+7 (701) 759 90 19
USD 422.87 EUR 503.38
RUB 5.6 CNY 64.3
Jańalyqtar

Sút bezi qaterli isiginiń belgisi baıqalmaıdy, sondyqtan jyl saıyn tekserilý qajet – dáriger-mammolog

2020 jylǵy 27 qazan 13:34
Bólisińiz:
Sút bezi qaterli isiginiń belgisi baıqalmaıdy, sondyqtan jyl saıyn tekserilý qajet – dáriger-mammolog

PETROPAVL. QazAqparat – Soltústik Qazaqstan oblysynda sút beziniń qaterli isigi onkologııalyq aýrýlar ishinde birinshi orynda tur. Ótken toǵyz aıdyń ishinde qaýipti dert jańadan 151 áıelde anyqtalǵan. Oblystyq aýrýhananyń onkologııalyq ortalyǵynyń mammolog-dárigeri Maııa Toqsanova QazAqparat tilshisine suhbat berip, sút beziniń obyryna qatysty aqparatpen bólisti.

Uqsas jańalyqtar
Koronavırýs: ShQO-da naýqastarǵa 350 dozadan astam ımmýndyq plazma quıyldy Eýropadaǵy koronavırýs: Sarapshylar nege alańdap otyr Túrkistan oblysyndaǵy aýrýhanalar tynys alý apparattarymen tolyqtaı qamtylǵan

- Maııa Maratqyzy, sút bezi qaterli isiginiń belgileri bar ma?

- Sút bezi qaterli isiginiń belgileri syrt kózge asa baıqala bermeıdi. Bul dert sonysymen de qaýipti. Óıtkeni obyrdyń alǵashy eki kezeńinde keýdede esh ózgeris bolmaýy múmkin, tipti aýyrmaıdy da. Al asqynǵan saıyn kókirekte assımetrııa paıda bolady. Tós tyǵyzdalyp, suıyqtyq bólinýi múmkin. Terisi qabyrshaqtanyp, apelsın qabyǵyna uqsaıdy.

Sút bezi ózdiginen óte sırek aýyrady. Kóbine ol etekkir keler aldynda jaısyzdyq týdyrýy múmkin. Bul – qalypty jaǵdaı. Maǵan patsıent kelgende keýdesiniń qaı jeri aýyratynyn suraımyn. Sút bezi keýde qýysynda ornalasqan, sol sebepti torakalgııanyń saldarynan kókiregi aýyrady dep oılaıdy.

Al sút beziniń qaterli isiginde kókirek aýyrmaıdy. Sondyqtan tekserilýge kelgen syrqattarǵa obyr barlyǵyn aıtqanda, meniń esh jerim aýyrmaıdy ǵoı dep tań qalyp jatady.

- Qaı ýaqytta dárigerge kóringen jón?

- Etekkir bastalǵannan keıin 7-9 kúni dárigerge kóriný qajet. Іsikti tek qana ýltradybystyq zertteý nemese rentgenologııalyq mammografııa arqyly tabady. Biraq RMM apparatyn 40 jasqa deıin qoldanýǵa bolmaıdy.

- Sút beziniń qaterli isigi negizinen qaı jastan keıin paıda bolýy múmkin?

- Aýrý orta jastan asqan áıelderde, ıaǵnı 55-60 jastan keıin tabylady. Biraq sońǵy kezde jas qyz-kelinshekter de aýyratyn bolǵan. 30-45 jas aralyǵyndaǵy áıelderge de osy dıagnoz qoıylatyn bolǵan. Olar barlyq tirkeletin syrqattardyń 7% quraıdy.

Sút bezi qaterli isigi jastarda bolǵan jaǵdaıda ony kóbinese áıel ózi anyqtaıdy. Sondaı-aq mts túıinder qoltyq astynda paıda bolady. Taǵy bir ereksheligi negizinen obyrdyń agressıvti túri damıdy.

- Keýdege ımplant qoıý obyrdyń paıda bolýyna áser etedi me?

- Joq, bul ǵylymı túrde dáleldendi. Biraq ÝDZ, MMG dıagnostıkadan únemi ótip turý qajet. Bul ekeýi eki túrli zertteý bolǵanymen, bir-birin jaqsy tolyqtyrady. Biraq ımplant qoıdyrý basqa aýrýdyń paıda bolýyna áser etýi múmkin. Ol - anaplastıkalyq iri jasýshaly lımfoma. Al fıbroadenoma anyqtalsa, ony búginde 2 sm aspaıynsha almaıdy. Bul qatersiz isik.

- Mastopatııa degen ne?

- Bul postkeńestik dárigerlerdiń súıikti termıni dep aıtar edim. Óıtkeni shyndyǵyna kelgende mastopatııa degen dıagnoz joq. Sút bezi – gormonǵa táýeldi organ. Gormondyq fondaǵy ózgeris oǵan áser etip, aýyrýy múmkin. Máselen, qalqansha bez, gıpofız adenomasy, gınekologııalyq aýrýlarǵa baılanysty. Sol sebepti tek qana sút bezin emdeýdiń nátıjesi shamaly. Negizgi aýrýdy anyqtaý qajet, al sút beziniń aýyrǵanyn jeńildetý úshin jaqpa maılardy paıdalanýǵa bolady. Kelgen syrqattardy endokrınolog pen nevropatologke keńes alýǵa jiberetinim de sondyqtan.

- Sút bezi qaterli isigi barlarǵa bala týýǵa bola ma?

- Aldynda aıtyp ketkenimdeı, jas kelinshekterde de obyrdyń bul túri anyqtalatyn bolǵan. Keıde júkti áıelderde anyqtalyp jatady. Biraq, qorqýdyń qajeti joq. Emdeý barysynda áıeldiń jaǵdaıy eskerilip, balaǵa zııan tımeıtin joldary tańdalady.

Sút bezi qaterli isiginen emdelip shyqqannan keıin bala súıetinder bar. 5 jyldan keıin júkti bolsa qaıtalaný táýekeli kemıdi.

- Qaýipti aýrýdyń aldyn alýǵa bola ma?

- Sút bezi qaterli isiginiń paıda bolýyna kóp nárse áser etýi múmkin, onyń naqty sebebi joq. Biraq biz durys tamaqtaný arqyly, ıaǵnı jemis-jıdekti kóbirek jeý arqyly kóptegen aýrýmen kúrese alamyz. Temekiden bas tartyp, spırttik ishimdikterdi azaıtqan durys. Sportpen shuǵyldaný qajet. Áıel ýaqytynda bala týyp, barynsha uzaq emizgeni durys. 40 jastan asqannan keıin jylyna bir ret ÝDZ jáne eki jylda bir ret MMG jasaýǵa keńes beremin.

- Áńgimeńizge rahmet!


Bizdiń kanalymyzǵa jazylyńyz:

Bólisińiz:

Avtor:

Aqerke Dáýrenbekqyzy

Pikir qaldyrý
+7
Jiberý
ONLAIN QYZMETKERLER
REDAKTOR
Gúlmıra Alıakparova
Gúlmıra Alıakparova
954-059
REDAKTOR
Janıbek Amangeldı
Janıbek Amangeldı
954-059
REDAKTOR
Jarylqasyn Saıagúl
Jarylqasyn Saıagúl
954-059

MURAǴAT