Sýrdlımpıada jeńimpazdaryna 250 myń dollarǵa deıin syıaqy jáne páter beriledi
2022 jylǵy 27 maýsym 16:53

Sýrdlımpıada jeńimpazdaryna 250 myń dollarǵa deıin syıaqy jáne páter beriledi

NUR-SULTAN. QazAqparat – Nur-Sultan qalasynda XXIV sýrdlımpıada Qazaqstan namysyn qorǵap, jeńimpaz atanǵan sportshylar marapattaldy, dep habarlaıdy QazAqparat tilshisi.

«Sýrdlımpıada oıyndarynda bizdiń oıynshylar jaqsy oıyn kórsetti. Maqtanyshpen aıtýǵa bolady. Barlyǵy 28 medal qorjynda, onyń ishinde 3 altyn, 7 kúmis jáne 18 qola bar. Búgin jeńimpazdardy marapattaý saltanatyn ótkizip jatyrmyz. XXIV sýrdlımpıadaǵa elimizden 100-ge jýyq sportshy qatysty. Qazaqstan bul básekege osymen jetinshi ret qatysyp otyr. Aldaǵy ýaqytta sýrdlımpıadada el namysyn qorǵaıtyn sportshy kóbeıe túsedi degen oıdamyn», - dedi QR Mádenıet jáne sport mınıstrligi sport jáne dene shynyqtyrý isteri komıtetiniń tóraǵasy Samat Erǵalıev.

Vıtse-mınıstrdiń aıtýynsha, qazaqstandyqtar XXIV sýrdlımpıadaǵa sporttyń 8 túrinen qatysty.

«Sýrdlımpıada sportshylaryn keńinen nasıhattaý kerek. Erekshe sportshylarymyz qol-aıaǵy saý sportshylarmen birdeı el namysyn qorǵap júr. Sporttyń qaı túrinen jetistikke jetse de, memleket tarapynan bárine birdeı qarjylaı syıaqy qarastyrylǵan», - deıdi ol.

Mınıstr orynbasarynyń málimetinshe, XXIV sýrdlımpıadada 1 oryn alǵan sportshyǵa 250 myń AQSh dollary kóleminde syıaqy beriledi.

2 orynǵa - 150 myń dollar, al 3 oryn ıelengen sportshyǵa - 75 myń dollar syıaqy tabystalady.

Odan bólek, S. Erǵalıev jeńimpaz bolǵan sportshyǵa 3 bólmeli páter, 2 oryn ıelense 2 bólmeli, al 3 orynǵa turaqtaǵan oıynshyǵa 1 bólmeli páter beriledi.

Atalǵan saltanatty sharada sportshylardan bólek jattyqtyrýshylar da syı-marapatqa ıe boldy.

Aıta ketsek, XXIV sýrdlımpıa oıyndary bıyl 1-15 mamyr aralyǵynda Brazılııanyń Kashıas-de-Sýl qalasynda ótti.


Seriktester jańalyqtary

Jańalyqtar

Úrdis

MURAǴAT